Սա կարևոր է մեր պայքարում. «Գոյ» թատրոնի գործով դատական նիստ է կայացել

Վարչական դատարանում նախօրեին կայացել է «Գոյ» թատրոնի գործով հերթական դատական նիստը։ «Գոյի» կառավարման խորհրդի նախագահ, ռեժիսոր Սարգիս Արզումանյանը գրում է. «Գոյ թատրոնի դատական գործընթացը նոր փուլում է. հաջորդ նիստը՝ մայիսի 16-ին։

Այսօր կայացած դատական նիստի ընթացքում դատավորը պահանջեց կողմերից որոշակի պարզաբանումներ, ինչը հնարավորություն տվեց մեր միջնորդությունն առաջ մղել։ Դատարանը բավարարեց հայցի հստակեցման և պահանջի որոշ հատվածներ՝ մասնավորապես, Գոյ թատրոնի աշխատակիցներին աշխատանքից հեռացնելու հրամանները անվավեր ճանաչելը։

Սա կարևոր է մեր պայքարում, քանի որ հաստատում է, որ Գոյի աշխատակիցների իրավունքները չեն կարող անտեսվել։ Թեև մեր մյուս պահանջները դեռ սպասում են արդարադատությանը, դատարանը որոշում կայացրեց անցնել դատաքննության փուլ։ Հաջորդ դատական նիստը կկայանա մայիսի 16-ին, ժամը 15:30-ին։

Մեր պայքարը շարունակվում է, և մենք կանգ չենք առնելու, քանի դեռ արդարությունը ամբողջությամբ վերականգնված չէ։ Մշակույթը չի կարող լինել խոչընդոտների և կամայական որոշումների զոհ։

Միացեք մեզ, բարձրացրեք ձեր ձայնը, և եկեք պաշտպանենք մեր թատրոնը, մեր մշակույթը, մեր արժեքները»։ 

Հիշեցնենք՝ 2024 թ. հունվարի 30-ին կառավարության որոշման համաձայն, պետական ռեգիստրը «Գոյ» թատրոնը վերակազմակերպել է՝ միավորելով  Սունդուկյանի անվան ազգային ակադեմիական թատրոնի հետ։ «Գոյ» թատրոնի ստեղծագործական ու դերասանական կազմերը դեմ են այդ միավորմանը, հայտարարել են՝ չեն գնալու աշխատել Սունդուկյանի անվան ակադեմիական թատրոնում։ Նրանք միավորման վերաբերյալ կառավարության որոշումը վիճարկում են դատարանում։
Աղբյուրը` Panorama.am