Դուրս գալով ՀԱՊԿ-ից՝ Հայաստանը որևէ նոր հնարավորություններ չի ստանում, բայց կարող է խնդիրներ ստանալ. Սերգեյ Մելքոնյան

«Հայաստանի դիրքորոշումը ՀԱՊԿ-ի հարցում շատ պարզ է. Հայաստանը չի վերադառնալու այն ձևաչափին, որ երկար տարիներ գործում էր, ընդհակառակը՝ ի վերջո Հայաստանը ՀԱՊԿ-ի հետ որևէ կապ չի ունենալու»,- Հայկական Հետազոտական ​​Ինստիտուտի (ARI) և Ռոսսոտրուդնիչեստվոյի կողմից կազմակերպված փորձագիտական ​​քննարկման մեկնարկից առաջ լրագրողներին ասաց պատմական գիտությունների թեկնածու, վերլուծաբան, APRI Armenia-ի գիտաշխատող  Սերգեյ Մելքոնյանը։

Նա նշեց, երբ խոսում են ֆինանսական բաղադրիչի մասին, ստեղծվում է մի միջոց, որի հիման վրա Հայաստանը կարող է ՀԱՊԿ-ից դուրս գալ ոչ Հայաստանի կամքով, այլ ՀԱՊԿ-ի կամքով։ Սա այդ հիմնական միջոցներից մեկն է։

«Կա նաև ՀԱՊԿ-ից Հայաստանի դուրս գալու երկրորդ ճաապարհը. Ադրբեջանի կողմից հարձակման  հավանականությունն աճում է։ Եթե հարձակում տեղի ունենա՝ կապ չունի  լայնածավալ, կամ փոքր մասշտաբի,  եթե ՀԱՊԿ-ը որևէ քայլ չձեռնարկի, նույնիսկ հայտարարություն չլինի, հնարավորությունների պատուհան կստեղծվի, որ Հայաստանն արդեն ոչ  թե դե ֆակտո, այլ դե յուրե ՀԱՊԿ-ից դուրս գա»,- ասաց վերլուծաբանը։

Հիշեցնենք, որ ՀՀ ԱԳՆ-ն ավելի վաղ հայտարարել էր. «Հայաստանյան կողմը պաշտոնապես տեղեկացրել է ՀԱՊԿ քարտուղարությանը, որ ձեռնպահ կմնա «ՀԱՊԿ 2024 թ. բյուջեի մասին» ՀԱՊԿ ՀԱԽ որոշման ստորագրումից և դրանով նախատեսված կազմակերպության գործունեության ֆինանսավորմանը մասնակցելուց»։

Անդրադառնալով ՀՀ ԱԺ կողմից ընդունված «Եվրոպական միությանը ՀՀ անդամակցելու գործընթացի մեկնարկի մասին» օրենքի նախագծին, Ս. Մելքոնյանն ասաց. «Այս նախագիծով որևէ եվրոպական հեռանկար չկա։ Այս նախագիծը ինտեգրացիայի գործընթացի հետ որևէ կապ չունի։ Կան առանձին կետեր, որը Հայաստանը պետք է ընդունի քայլ առ քայլ։ Դրանից հետո  նոր կարելի է  խոսել, որ Հայաստանում մեկնարկել է  ԵՄ անդամակցության օրակարգ։

Այս օրենքը, ըստ ինձ, ներքին բնույթ է կրում, որովհետև տեսնում ենք, որ պատրաստվում են 2026 թվականի ընտրություններին, շատ կարևոր է տարբեր քաղաքական գործիչների տեսանկյունից ցույց տալ, որ Հայաստանը եվրոպական ճանապարհով է գնում ու այս միջոցը կիրառելով՝ ապահովել իրենց  հաջողությունն ընտրություններում։

Բայց ԵՄ անդամակցության հետ այս օրենքն ընդհանրապես որևէ կապ չունի։ ԵՄ որևէ բարձրաստիճան պաշտոնյա չի ողջունել, որ Հայաստանն ընդունեց այս օրենքը»։

Վերլուծաբանն ընդգծեց, որ Հայաստանն առնվազն առաջիկա 10 տարիների ընթացքում չի կարող դառնալ ԵՄ անդամ, դա բացառվում է տեխնիկապես։

«ՀԱՊԿ-ից դուրս գալն ու ԵՄ անդամակցությունն իրենք փոխկապակցված հարցեր չեն։ ՀԱՊԿ-ն անվտանգության մասին է, այո,  այսօրվա Հայաստանի համար անվտանգության պրովայդեր չէ, բայց, դուրս գալով ՀԱՊԿ-ից՝ Հայաստանը որևէ նոր հնարավորություններ չի ստանում, բայց կարող է խնդիրներ ստանալ և այս քայլը փոխկապակցել  ԵՄ անդամակցության հետ, ավելի խնդրահարույց կլինի։ Չարժի այս հարցերը կապել»,- ասաց Ս. Մելքոնյանը։

Ինչ վերաբերում է  ԵՄ-ն ԵԱՏՄ-ին հակադրելուն,  նա նշեց. «Սա տեխնիկական հայտարարություն է, ոչ թե քաղաքական, որ Հայաստանը չի կարող լինել ԵԱՏՄ անդամ  և ԵՄ անդամակցության օրակարգ որդեգրել, որովհետև  չեն համընկնում տեխնիկական հարցերով։

Ռուսաստանի տեսանկյունից Հայաստանը փորձում է մնալ ԵԱՏՄ-ում՝ օգտվելով  ֆինանսական և այլ հնարավորություններից, բաց կամաց-կամամց  շեղվել դեպի ԵՄ։ Սա քաղաքական որոշման հարց է, բայց ես չեմ տեսնում, որ Հայաստանն իրականում որոշում է  կայացրել անդամակցել ԵՄ-ին։ Այս հարցը օրակարգում չկա»։

Աղբյուրը` Panorama.am