Ինչո՞ւ է լռում Մարտուն Գրիգորյանը և ո՞վ իրականում պատժեց Նավակ Ճոճողին. Տիգրան Քոչարյան

Մարտի 30-ին Գյումրիում տեղի ունեցան ՏԻՄ ընտրություններ, որի արդյունքում Գյումրու ավագանի անցավ 5 քաղաքական ուժ՝ «Քաղաքացիական պայմանագիր» կուսակցությունը, Հայաստանի կոմունիստական կուսակցությունը, «Մեր քաղաքը» կուսակցությունների դաշինքը, «Իմ հզոր համայնք» կուսակցությունը և «Մայր Հայաստան» կուսակցությունների դաշինքը:

Հետընտրական հայրաքաղաքում ինտրիգը շարունակում է լարված պահել բոլորին. քվեարկության արդյունքները հայտնի են, բայց դեռ պարզ չէ, թե շեմը հաղթահարած ընդդիմադիր 4 ուժերն ինչ կարգավիճակով են ապրիլի 16-ին մտնելու քաղաքապետարան:

Թեմայի վերաբերյալ զրուցել ենք Alpha News-ի գլխավոր խմբագիր Տիգրան Քոչարյանի հետ:

«Տարբեր վարկածներ կան, թե ինչու է լռում Մարտուն Գրիգորյանը: Լռում է, որովհետև իր հաշվարկները չեն արդարացել ու ինքը հաղթանակ չի տարել Գյումրիում: Հիմա ստիպված կոալիցիա պիտի կազմի իր ոխերիմ թշնամու՝ Վարդան Ղուկասյանի հետ: Սա ավելի շատ ոչ թե իր, այլ իրեն սատարող քաղաքական ուժերի նախաձեռնությունն է, որոնք այս կամ այն կերպով որոշակի քաղաքական հարցեր են լուծում: Գլոբալ առումով՝ Գյումրիում ժողովուրդը մերժեց Նիկոլին»,- ընդգծել է մեր զրուցակիցը:

Նրա խոսքով՝ բոլորը սպասում էին, որ Մարտուն Գրիգորյանը կսատարի ընդդիմությանը՝ կոալիցիա կազմելուն, բայց նա շարունակում է լռել:

«Ընտրություններից հետո առավոտյան միանգամից և՛ Ռուբեն Մխիթարյանը, և՛ Կարեն Սիմոնյանը, որոնք երկու ընդդիմադիր ուժերի ցուցակը ղեկավարող մարդիկ են, ասացին՝ պատրաստ են սատարել Վարդան Ղուկասյանին՝ որպես ամենաշատ ձայն հավաքած ընդդիմադիր ուժի: Բոլորը սպասում են, որ Մարտուն Գրիգորյանը նույնը կանի: Չարեց: Լռեց, լռեց, 12 ժամ անց ինչ-որ հայտարարություն արեց, որ ՔՊ-ն երբեք չի լինելու իշխանության: Մարդիկ դա չէին սպասում, սպասում էին, որ Գրիգորյանը այս կամ այն կերպով աջակցելու է այդ կոալիցիային:

Մարտուն Գրիգորյանի կերպարը օգտագործվում է նաև այլ մարդկանց կողմից: Այն, որ ինքը Վարդան Ղուկասյանի հետ խնդիր ունի, օգտագործվում է, որ կամ տապալվի, կամ հետաձգվի ընդդիմության հաղթանակի վերջնական գրանցումը Գյումրիում»,- եզրափակել է Տիգրան Քոչարյանը:

Մանրամասները՝ տեսանյութում: