Այս աստիճան անտերություն ու անտարբերություն կլինի՞, որ Շիրակում է․․․

Քաղաքագետ Դերենիկ Մալխասյանը գրում է. «Հուսամ կառավարության անդամներն ու հատկապես Շիրակի մարզպետը վերջացրել է ՔՊ-ի համար Գյումրիում բուկլետ բաժանելը, ու հիմա պետք է, որ զբաղվեն Շիրակում առկա խնդիրներով, հատկապես այս՝ գարնանացանի ժամանակ։
Հետաքրքրվեն վար ու ցանքի աշխատանքներով, թե ինչպե՞ս են ընթանում, կա՞ն արդյոք արհեստական խոչընդոտներ, այսինքն՝ զբաղվեն իրենց ուղիղ պարտականություններով, որպեսզի գարնանացանն էլ Շիրակում աշնանացանի պես չտապալվի։
Ասենք, հետաքրքրվեն, թե ինչն է պատճառը, որ տարբեր համայնքներում, հատկապես Անիի սահմանային գյուղերի, փշալարերից այն կողմ թողած վարելահողերի վրա չի սկսվել գարնանացանը։ Հետաքրքիր է, արդյոք Շիրակի մարզպետարանն ու մարզպետը տեղյա՞կ է, որ գարնանացանի, վար ու ցանքի ամենակարևոր շրջանն է մարզում և հատկապես Անիի՝ հայ-թուրքական սահմանի երկայնքով սփռված գյուղերում, որտեղ հազարավոր հեկտար վարելահողեր սահմանի փշալարերից ներս են գտնվում, բայց գյուղացիները դեռևս չեն կարողանում ներս մտնել ու գարնանացանով զբաղվել՝ անցաթղթերի տրամադրման ձգձգման պատճառաբանությամբ։
Նույն տարածքներում գրեթե ամբողջությամբ աշնանացան չի արվել, այդ ամենաաղքատ գյուղերի հողագործները հույսը գարնանացանի վրա էին դրել, բայց․․․ բայց լավ, ասենք այս աստիճան անտերություն ու անտարբերություն կլինի՞, որ Շիրակում է․․․