Փաշինյանն ստիպված էր ընդունել իր ու ՔՊ-ի պարտությունը

Նիկոլ Փաշինյանը գործնականում ստիպված էր ընդունել Փարաքարի և Գյումրու ՏԻՄ ընտրություններում մարտի 30-ին արձանագրված իր ու ՔՊ-ի պարտությունը: Նրան այլ բան չէր մնում, քան այդ պայմաններում «ինքնավերացարկվելը» և... ընտրության արդյունքները իրեն վերագրելու փորձը:   
Փաշինյանը... շնորհավորել է նախօրեին Գյումրիում և Փարաքարում կայացած ավագանու արտահերթ ընտրություններում հաղթած բոլոր քաղաքական ուժերին և թեկնածուներին։
«Հայաստանի Հանրապետության Քաղաքացին ազատորեն ընտրություն կատարելու հնարավորություն ունի։ Քաղաքացու ընտրությունը մեզ համար օրենք է։ Շնորհավորում եմ Քաղաքացու վստահությանը արժանացած, ընտրություններում հաղթած բոլոր քաղաքական ուժերին եւ թեկնածուներին։ Հ․Գ․ Ընտրողների կամքի վրա ապօրինի ազդեցության մասին բոլոր ահազանգերը պետք է մանրամասն քննվեն, դրանց հետագա կրկնությունը բացառելու առաջնահերթ նպատակադրմամբ»,- գրել է Նիկոլ Փաշինյանը։

Մեր կողմից նկատենք. «քաղաքացու ընտության» և այն անվերապահ ընդունելու մասին խոսում է մեկը, որ բազմիցս բռնացել է նույն այդ քաղաքացիների ընտրության արդյունքների վրա, ինչն առավել ցայտուն դրսևորվել է հենց ՏԻՄ-երի դեպքում (Վանաձոր, Ալավերդի, Գյումրի, Բերդ և այդպես շարունակ, դեռ Երևանում «ձեռնածություններով» քաղաքապետի պաշտոնը պահելու մասին էլ եթե չնշենք):
Ավելին, «ազատորեն ընտրություն կատարելու» մասին խոսում է ղեկավարը մի իշխանության, որը կոնկրետ Գյումրու ընտրություններում անխնա չարաշահեց վարչական ռեսուրս ասվածը, ընդդիմադիր թեկնածուների դեմ  վերբալ ու վիզուալ (պլակատային) ագրեսիան ու հակաքարոզչությունը «բարձրացրեց» արդյունաբերական մասշտաբների, որքան հնարավոր էր՝ դիմեց ռեպրեսիաների, ընդդիմադիր մրցակիցների դեմ  բռնաձնշումների ու կանխամտածված խափանումների (ձերբակալություններ, խուզարկություններ, ընտրարշավի կազմակերպման ընթացքի խափանումներ): 
Ա.Հ.
Zham.am