Գյումրիում ՔՊ թեկնածու Սարիկ Մինասյանը լրագրողների հետ զրույցում ակնհայտորեն լարված էր

Գյումրիում ՔՊ-ի թեկնածու Սարիկ Մինասյանը քվեարկելուց հետո լրագրողներին մոտեցավ՝ երեխան գրկին: Լրագրողների հետ նրա զրույցի սկիզբը մի փոքր նյարդային ստացվեց, լրագրողներից մեկին ասաց, թե նրա հարցերին չի պատասխանի: Առհասարակ, զգացվում էր, որ հակված չէ հարցերին պատասխանել, ինչում կարող եք համոզվել՝ դիտելով տեսանյութը: 
Նշենք, որ ընտրարշավի վերջին օրը Նիկոլ Փաշինյանը «լքեց» իր թեկնածուին, ու չնայած ավելի վաղ դա նախատեսված էր, վարչապետի պաշտոնն զբաղեցնողն այդպես էլ Գյումրի չմեկնեց:

Ինչպես հաղորդում է Aysor.am-ը Գյումրիի քաղաքապետի ՔՊ թեկնածու Սարիկ Մինասյանը քվեարկությունից հետո լրագրողների հետ զրույցում ասաց, որ քվեարկել է հանուն զարգացող Գյումրու, համերաշխ քաղաք ունենալու համար։

«Մեր գյումրեցիները շատ գիտակից են, իրենց ընտրությունը կկատրեն, վաղն ականատես կլինեք»,-ասաց նա։

Հարցին, թե Մարտուն Գրիգորյանի հետ ի՞նչ միջադեպ է եղել, Սարիկ Մինասյանը նշեց, որ ոինչ չի եղել, իրենք ընկերներ են։ Դիտարկմանը, թե ճի՞շտ է, որ Մարտուն Գրիգորյանն իրեն ապտակել է՝ Մինասյանն արձագանքեց. «Ինձ ապտակող չի ծնվել, Մարտուն Գրիգորյանը հերքել է, ասել է միջադեպ չի եղել։ Չի ծնվել այդպիսի որևէ մեկը... խնդրում եմ այդպիսի մանիպուլյացիոն հարցեր մի տվեք»,-ասաց նա։

ՔՊ թեկնածուն նշեց՝ համոզված է, որ 50+1 ձայն կհավաքի։ Նա նաև պնդեց, որ հանրահավաքին մարդ չի բերել այլ տեղերից։

«Կհանդիպենք վաղը, կգաք շնորհավորելու, հանգիստ կնստենք բոլորի հետ, հետաքրքիր զրույց կունենանք»,-ասաց նա։

Հարցին, թե Մինասյանն Արցախն առաջ էլ էր ատո՞ւմ, թե ՔՊ մտնելուց հետո է սկսել ատել՝ պատասխանեց, որ ինքն Արցախը չի ատում։