Կոչ գյումրեցի ընտրողներին՝ նրանց, ովքեր ինձ ճանաչում, հարգում և վստահում են. Վահան Թումասյան

«Մեծարգո բարեկամներ, ինչպես արդեն գիտենք առաջիկա կիրակի օրը՝ մարտի 30-ին, Գյումրիում կայանալու են ՏԻՄ արտահերթ ընտրությունները։ Եվ Գյումրու ավագանու առաջիկա ընտրություններին, որպես ավագանու անդամի թեկնածու առաջադրվել է Դերենիկ Մալխասյանը՝ ընդգրկվելով «Մայր Հայաստան» դաշինքի ցուցակի երկրորդ համարում։
Նրա մասնակցությունը ես չեմ դիտարկում լոկ քաղաքական քայլ։ Հիմա չեմ ուզում խոսել նրա՝ բառիս բուն իմաստով, անբասիր կենսագրությունից, քանզի նրա գործունեությունը, որպես լրագրող, մեկնաբան, հրապարակախոս և հետազոտող, առնվազն վերջին 20 տարիներին եղել է բոլորիս աչքի առաջ։

Առհասարակ, ընտրվելով ավագանու անդամ, նա լինելու է քաղաքի կառավարման բարձրագույն մարմնում մեր քաղաքի պատմամշակութային ժառանգության պահպանման համար ամենակարևոր անձերից մեկը։ Նրա ավագանի դառնալու համար պետք է շահագրգռված լինի յուրաքանչյուր գյումրեցի, ում համար, իհարկե, կարևոր են մեր քաղաքի անցյալը, ներկան ու ապագան։ Գյումրի-Ալեքսանդրապոլ-Լենինականի անցյալի, առնվազն վերջին 150 տարիներին տեղի ունեցած ուրախ և տխուր իրադարձությունների, հաջողությունների և անհաջողությունների, ձեռքբերումների և դրանց հեղինակների, այդ ամենը մեր ժամանակների հետ համեմատական վերլուծությունների, ամենածավալուն աշխատանք կատարած անձնավորությունն է։
Դերենիկը տարիներ շարունակ հսկայածավալ աշխատանքի արդյունքն ու պտուղները՝ ամբողջը, անմնացորդ հանրության սեփականությունն է դարձնում, գրեթե ամենօրյա ռեժիմով։

Այս ընտրություններին Դերենիկը իր մասնակցությամբ լրիվ այլ որակ հաղորդեց, համոզված եմ նույն կերպ կլինի ավագանու անդամ դառնալու պարագայում։ Դերենիկը հանուն մեր քաղաքի ժառանգության, պատմամշակութային հուշարձանների և պատմության պահպանման ու ապագա սերունդներին փոխանցման գործի անմնացորդ նվիրյալն է։

Հանուն մեր սիրելի քաղաքի, այդ ամենը ինչ նա արել և անում է Հայաստանի և օտար արխիվներում, գրասեղանի առաջ՝ անքուն գիշերներ լուսացնելով, և այդ ամենը, մի օր պետք է այսպես ասած՝ միս և արյուն ստանար՝ իշխանության լծակների օգտագործմամբ։

Այո, համոզված եմ, նա հանուն մեր պատմական ժառանգության պահպանման, հանուն մեր ավանդույթների և մշակույթի պահպանման, հանուն բոլորիս սիրելի քաղաքի է դա անում, ուստի կրկին անգամ կոչ եմ անում ընտրությունների օրը գնալ տեղամասեր և քվեարկել «Մայր Հայաստան» դաշինքի օգտին, որի 2-րդ համարում է ընդգրկված Դերենիկ Մալխասյանը։

Հավատացեք, Դերենիկը մեր քաղաքին՝ ամբողջությամբ և ամենայն անկեղծությամբ է նվիրված»։

Հարգանքով՝ Վահան Թումասյան