Ռուսաստանը՝ թշնամի, իսկ Թուրքիայի մասին ոչ մի բացասական խոսք

Փաշինյանյանական քարոզչամեքենայի գործունեության սկզբունքները:

Քաղաքագետ Բենիամին Մաթևոսյանն Alpha News-ի եթերում «Վերնագիր» հեղինակային հաղորդման ընթացքում ներկայացրել է թեմայի շուրջ մասնագիտական վերլուծություն, որում մասնավորապես ասվում է.

«Հայաստանի և Ադրբեջանի միջև «խաղաղության պայմանագրի հոդվածների» համաձայնեցման մասին հայտարարությունից հետո, իշխանամետ քարոզչությունը բազմաթիվ անգամ (նույնիսկ իրենց համար անթույլատրելիորեն շատ անգամներ) հայտնվել է անախորժ վիճակում։ Ամենավերջին օրինակներից մեկը ֆրանսիական հեռուստաալիքի քարտեզներում «Հայաստանի անհետացման» հետ կապված իրավիճակն է։

Ֆրանսիական «Arte France» հեռուստաալիքն իր «28 րոպե» հաղորդման մեջ ներկայացրել է տարածաշրջանի քարտեզը՝ առանց Հայաստանի։ Դրա մասին առաջինը տեղեկացրել է «Le Figaro» ամսագրի փոխտնօրեն Ժան-Քրիստոֆ Բուիսոնը։ Մասնավորապես, ռեպորտաժում անդրադարձ էր արվել Թուրքիայում տեղի ունեցող հակակառավարական ցույցերին։

Ֆրանսիայի հայկական կազմակերպությունների համակարգող խորհուրդը (CCAF) դեպքի առթիվ նշեց, որ Հայոց ցեղասպանությունից 110 տարի անց «Arte France»-ն իրականացնում է պանթուրքիստական երազանքը և պարզապես ջնջում Հայաստանն աշխարհի քարտեզից։ «Սա անընդունելի է։ Անհրաժեշտ է ներողություն խնդրել և շտկել իրավիճակը», — ասվում էր հայտարարության մեջ։

Իհարկե, հարցի վերաբերյալ ակտիվ քննարկում է տեղի ունեցել նաև Հայաստանում, և այս հարցում առանձնահատուկ ակտիվություն ցուցաբերեց փաշինյանական քարոզչությունը։ Այն ոչ միայն փորձում էր համոզել քաղաքացիներին, որ «քարտեզների հետ ամեն ինչ կարգին էր, ու որ Հայաստանը ներկայացված էր իր միջազգայնորեն ճանաչված սահմաններում», այլև նաև իրենք գտել էին «ռուսական հետք» այս տեղեկությունների տարածման մեջ։

Այս իրավիճակը ուսումնասիրելիս պետք է հիշել, թե ինչպես երեկ ԱԺ նախագահ Ալեն Սիմոնյանը հայտարարել էր. «Անընդհատ հո չենք կարող Ռուսաստանի հետ հարաբերություններում լարվածություն պահել»։ Կարող են և անում են դա, այն էլ առանց խուսափելու գեբելսյան մեթոդներից։ Ֆրանսիական հեռուստաալիքի քարտեզների դեպքը վառ ապացույց է։ Սա օրինակ է, որը պետք է ստիպի քաղաքացիներին մտածել՝ արդյոք միայն այս դեպքում են իրենց մանիպուլացնում։ Կարո՞ղ է պատահել, որ մանիպուլացվել է 2020 թվականի նոյեմբերի 9-ի հայտարարության սխալ մեկնաբանություններով։

Կարո՞ղ է պատահել, որ մանիպուլացվել է 2022 թվականի հոկտեմբերի 6-ին Պրահայում արված հայտարարության էության մասով։ Կարո՞ղ է պատահել, որ մանիպուլացվել են 2022 թվականին Ջերմուկի մոտ տեղի ունեցած էսկալացիան կանգնեցնողի մասին հայտարարությունները և այլն։

Ինչ վերաբերում է սկանդալային ռեպորտաժին, ապա պետք է նշել, որ հասարակական ճնշման (հատկապես՝ Ֆրանսիայի հայկական համայնքի) ներքո «Arte France» հեռուստաալիքը ներողություն խնդրեց այն բանի համար, որ իր հաղորդման մեջ ներկայացրել է տարածաշրջանի քարտեզն՝ առանց Հայաստանի։
Հաղորդման հաղորդավարուհի Էլիզաբեթ Քինը ներողություն խնդրեց տեղի ունեցածի համար՝ նշելով, որ սա կոլեկտիվ սխալ էր, և ծրագրի հեղինակները ցավում են կատարվածի համար։ Նա շնորհակալություն հայտնեց հեռուստադիտողներին ներողամտության համար՝ ընդգծելով, որ այստեղ չար մտադրություն չի եղել։

«Ռուսական հետքի» մասին ֆրանսիական հեռուստաալիքի հրապարակումներին վերաբերող իրավիճակը լավ օրինակ է նաև այն ռուս «փորձագետների» համար, որոնք կարող էին հալվել, ինչպես «Ձյունե թագուհին»՝ վերջին շրջանում հայկական մամուլում հրապարակված այն տեղեկություններից մասով, որ իբր «Փաշինյանը թեքվում է դեպի Մոսկվա»։ Պետք է արդեն հասկանալի լիներ, որ Փաշինյանը միշտ կայուն է։ Նա միշտ թեքված է դեպի Թուրքիա, իսկ դեպի Հայաստան, Արցախ, հայկական ժողովուրդ նա մշտապես մեջքով է կանգնած։ Իսկ դեպի Մոսկվա՝ առավել ևս։

Մտածե՛ք այդ մասին․․․»։