Արթուր Ալեքսանյանը չի մասնակցել ՔՊ-ական թեկնածուի քարոզարշավին, լուսանկարն ավելի վաղ է արվել

Այսօր առավոտից սոցիալական ցանցերում ակտիվորեն տարածվում է հունահռոմեկան ոճի հայտնի ըմբշամարտիկ, աշխարհի բազմակի չեմպիոն, տարբեր տարիներին օլիմպիական խաղերի մեդալակիր Արթուր Ալեքսանյանի ու Գյումրու ՔՊ-ական թեկնածու Սարիկ Մինասյանի լուսանկարը։

Սոցցանցերի շատ օգտատերեր քննադատում են հայտնի մարզիկին իշխանության թեկնածուի քարոզարշավին մասնակցելու, նրան աջակցելու համար։

Արդյոք գյումրեցի մարզիկը քարոզարշավի շրջանակում է մասնակցե՞լ ինչ-որ միջոցառման, սատարո՞ւմ է իշխանության թեկնածուին։ Panorama.am-ն այս հարցերի պատասխանները փորձեց ստանալ հենց Ալեքսանյանից, սական նա տևական ժամանակ է՝ հեռախոսազանգերին չի պատասխանում։ «Քաղաքացիական պայմանագիր» կուսակցության Գյումրիի շտաբի խոսնակ Վլադիմիր Հալոբյանը Panorama.am-ի հետ զրույցում ասաց, որ լուսանկարն արվել է քարոզարշավի մեկնարկից առաջ, երբ Ալեքսանյանը Գյումրու քաղաքապետի պաշտոնակատար Սարիկ Մինասյանի հետ այցելել է իր անվան մարզադպրոց՝ ծանոթանալու իրականացվող աշխատանքներին։

Նրա խոսքով, նախընտրական քարոզչության ժամանակաշրջանում մարզիկը ՔՊ-ական թեկնածուի օգտին որևէ միջոցառման չի մասնակցել։

Սարիկ Մինասյանի ֆեյսբուքյան էջում որոնումը ցույց տվեց, որ լուսանկարը հրապարակվել է մարտի 11-ին, երբ Գյումրի էր այցելել Տարածքային կառավարման և ենթակառուցվածքների նախարարի պաշտոնակատար Դավիթ Խուդաթյանը։ Քարոզարշավը մեկնարկել է մարտի 15-ին, այն կշարունակվի մինչև մարտի 28-ը, մինչև 24։00-ն։

Քվեարկության նախորդ օրը և քվեարկության օրը նախընտրական քարոզչություն իրականացնելն արգելված է։