Ես հիշեցնում եմ բոլորին՝ փորձանք է գալիս,որի անունն է «խաղաղության պայմանագիր»․ Հրանտ Բագրատյան

«Մենք ինչ կարողանում ենք՝ անում ենք»,- Ազատության հրապարակում նախատեսված հանրահավաքից առաջ լրագրողների հետ զրույցում ասաց «Ազատություն» կուսակցության ղեկավար, Հայաստանի նախկին վարչապետ Հրանտ Բագրատյանը՝ պատասխանելով հարցին, թե արդյո՞ք իրատեսական է այս ճանապարհով Նիկոլ Փաշինյանի հեռացումը։

«Անում ենք անեմ ինչ՝ ասուլիս, հանրահավաք, զգուշացնում ենք ժողովրդին, բազմիցս ասել ենք՝ հեսա էս արհավիրքը կգա մեր ժողովրդի գլխին կամ այլ։ Մենք պարտավոր ենք դա անել, քաղաքական գործիչ ենք։ Մեզ հալածում են, քրեական գործեր են բացում ևայլն»,- հավելեց Բագրատյանը։

Անդրադառնալով «խաղաղության» պայմանագրին, Բագրատյան ասաց․ « Այնտեղ խաղաղության պայմանագիր չկա։ երբ երկու կողմերն իրար չեն ճանաչում, ի՞նչ պայմանագիր։ Ո՞ւմ հետ ենք ստորագրում պայմանագիր, որը մեզ չի՞ ճանաչում։ Ասում են՝ խաղաղություն, հետո նստում են ու ասում՝ դե եկեք հիմա սահմանները որոշենք։ Ադրբեջանը նորից հարձակվում է  մեր վրա։ Չէ որ խաղաղության պայմանագիրն Ադրբեջանին չի պարտավորեցնում, պայմանգրում չկա, թե որտեղ է սկսվում Հայաստանի սահմանը և որտեղ վերջանում։ Միայն հայկական կողմն է ասում՝ ճանաչում է Ադրբեջանին»։

Հարցին,թե միակողմանի պայմանագրի ստորագրումն ինչ հետևանքներ կարող է ունենալ, Բագրատյանն արձագանքեց․ « Դա դառնում է պատերազմի պայմանագիր, որովհետև դրանից հետո Ադրբեջանն ասելու է՝ «խաղաղության» պայմանագիր ստորագրել եք, դե եկեք սահմանները որոշենք, իսկ սահմանները որոշելու են իրենք»։

Նման իրավիճակից խուսափելու համար Բագրատյանն առաջարկում է մասնակցել հանրահավքներին, ճնշում  գործադրել։

«Վերջապես Փաշինյանին հանել աշխատանքից»,-ասաց նախկին վարչապետը։

Նա նաև նշեց, որ առաջիկայում նախատեսված է տարբեր քաղաքական ուժերի հետ հանդիպումներ։

«Ընդդիմադիր դաշտում միասնական լինելու խնդիր կա։ Փորձելու ենք այդ հարցը լուծել։ Նման քննարկումները սովորեցնում են ընդդիմադիր դաշտում գործող ուժերին միմյանց հետ աշխատել»,- ասաց Բագրատյանը՝ շարունակելով․ «Ես հիշեցնում եմ բոլորին, որ փորձանք է գալիս։ Այդ փորձանքի անունն է «խաղաղության պայմանագիր»»։

Բագրատյանն ասաց, որ  հանրությանը մտադիր են տեղյակ պահել հաջորդ քայելրի մասին։ Մասնավորապես, այսօրվա օրակարգում է 200 000 ստորագրություն հավաքելը , որի միջոցով անվստահության հանրաքվե պետք է անցկացվի։
Աղբյուրը` Panorama.am