Հանձնաժողովի նիստում իրավիճակը լարվեց. Ամեն մարդ հասկանում է իր փչացվածության աստիճանով
«Երեկ Ազգային ժողովի տարածքում՝ այս միջանցքում տեղի է ունեցել խայտառակագույն երևույթ»,- ԱԺ պաշտպանության և անվտանգության հարցերով հանձնաժողովի նիստի սկզբում հայտարարեց «Հայաստան» խմբակցության պատգամավոր Գեղամ Մանուկյանը՝ անդրադառնալով ՔՊ-ական պատգամավոր Անդրանիկ Քոչարյանի կողմից լրագրողին վիրավորելուն։
«Հանձնաժողովի նախագահ Անդրանիկ Քոչարյանը վիրավորել է ոչ միայն լրագրողին, այլև վիրավորանք է հասցրել սեռով պայմանավորված։ Սա դառնում է անթույլատրելի։ Պարոն Պապիկյան, որպես «Քաղաքացիական պայմանագիր» կուսակցության անդամ, սա պետք է ունենա իր արձագանքը»,-ասաց Մանուկյանը՝ ընդգծելով, որ ՔՊ կին պատգամավորներից որևէ մեկը չի արձագանքել միջադեպին, թեև շատ հաճախ կանանց մասին թեկուզ փոքրիկ ակնարկը հանդիպում է բուռն արձագանքին։
Դիմելով նիստին ներկա ու այլ լրագրողների՝ ընդդիմադիր պատգամավորն ընդգծեց, բավական է այլև հանդուրժել ԱԺ-ում իրենց դեմ ուղղված բոլոր հարձակումները։
«Բոյկոտեք Անդրանիկ Քոչարյանին, բոլոր այն պատգամավորներին, որոնք ձեզ վիրավորում են։ Դիմում եմ լրագրոական կազմակերպություններին, բավական է ձեներդ կտրած նստեք, բավական է։ Այս ամենը վաղը հանգեցնելու է տոտալիտար համակարգի»,-ասաց Մանուկյանը։
Անդանիկ Քոչարյանն արձագանքեց Մանուկյանին, ասաց՝ ընդամենը կրկնել է լրագրող Հռիփսիմե Ջեբեջյանին ուղղված Բագրատ Սրբազանի ասածը։ Հիշեցնենք, որ Սրբազան շարժման առաջնորդը լրագրողից նախ ներողություն էր խնդրել, ապա հորդորել Հովհաննես Ազոյանի անունը տալուց հետո մաքրել շուրթերը։
«Սրբազան բառը ես օգտագործում եմ միտումնավոր, երեկ ասացի հոգևորական։ Եթե դեմ եք Սրբազանի ասածին, իսկ դրա մեջ վիրավորական որևէ բան չկա։ Ընդամենը ես արձանագրել եմ, որ խոսքն օգտագործում են, պետք է լինի մաքուր, թե դուք ինչ եք պատկերացնում, ձեր պրոբլեմն է, ես պատկերացնում եմ մաքուր խոսքի դրսևորում։ Եթե դուք այլ բան եք հասկացել, ամեն մարդ հասկանում է իր փչացվածության աստիճանով»,-ասաց Քոչարյանը։
«Ներողություն ասելու փոխարեն... Մենք նիստ կանենք, բայց Դուք կնոջ եք վիրավորել, սա առաջին դեպքը չէ»,-միջամտեց «Հայաստան» խմբակցության պատգամավոր Աննա Գրիգորյանը։ Մանրամասները՝ տեսանյութում։
Աղբյուրը` Panorama.am
Հետևեք մեզ Facebook-ում