Բողոքի զանգվածային ցույցեր Երուսաղեմում. Նեթանյահուի նստավայրի մոտ ոստիկանության հետ բախումներ են եղել

Երուսաղեմում ցուցարարները բախվել են ոստիկանության հետ, երբ նրանք փորձել են ճեղքել բարիկադները՝ Իսրայելի վարչապետ Բենիամին Նեթանյահուի առանձնատուն ներխուժելու համար, գրում է Times of Israel-ը։

Հազարավոր մարդիկ դուրս են եկել Երուսաղեմի փողոցներ՝ բողոքելու հատուկ ծառայություների ղեկավար Ռոնեն Բարին պաշտոնանկ անելու կառավարության ծրագրերի դեմ՝ պահանջելով ազատ արձակել պատանդներին՝ չնայած Գազայում վերսկսված մարտերին:

Դեպքի վայրից լուսանկարներում երևում է, որ ոստիկանները ձերբակալել են մի քանի մարդկանց այն պահին, երբ ամբոխը փորձում էր ճեղքել բարիկադները:

Հակակառավարական ցույցերի առաջնորդ Մոշե Ռադմանը, Երուսաղեմում զանգվածային բողոքի օրվա ընթացքում ելույթ ունենալով վարչապետի նստավայրի մոտ, վարչապետ Բենյամին Նեթանյահուին համեմատել է նացիստների առաջնորդ Ադոլֆ Հիտլերի հետ:

«Մենք հաշիվ տեսանք Համանի հետ, Մենք հաշիվ տեսանք փարավոնի հետ, Մենք հաշիվ տեսանք բրիտանական մանդատի հետ, Մենք հաշիվ տեսանք Հիտլերի հետ... մենք սրանց հետ էլ հաշիվ կտեսնենք»,-հայտարարել է նա մեգաֆոնի միջոցով մյուս ցուցարարների ծափահարությունների ներքո:

Ինչպես հայտնում է Ynet-ը, Ռադմանը ավելի ուշ փորձել է մեղմել իր խոսքերը՝ նշելով. «Մենք չենք ուզում, որ Նեթանյահուի գլխից մի մազ պակասի, մենք միայն ուզում ենք, որ նրան վռնդեն կաբինետից և մինչև կյանքի իր վերջին օրը նրան բանտում թողեն»։
Աղբյուր՝ News.am