Ինչո՞ւ Փաշինյանը Գյումրու ընտրություններում որոշեց խաղի մեջ մտցնել նաև իր երկրորդ քաղաքական ուժին՝ «եվրադրածոներին»

Գյումրու  ընտրություններում,  իշխանության բոլոր հաշվարկներով, գրանցվելու է իրենց համար բացասական արդյունք:

Նույնիսկ, երբ իշխանությունը փորձի օգտագործի իր բոլոր վարչական ռեսուրսները, միևնույն է, նա չի կարողանալու միայնակ իշխանություն ձևավորել:

Սարիկ Մինասյանը կամ Նիկոլ Փաշինյանը պիտի լինեին Հայաստանի «Շարլ Դը-Գոլերը», որպեսզի կարողանային հավաքել 50%+ 1 ձայն:

Սակայն իրենք գիտեն, որ ոչ հայկական Նապոլեոնն են, ոչ էլ՝ Փաշինյանի  նախկին էյֆորիան գոյություն ունի:

Հաշվի առնելով դա,  իշխանության միակ հույսը պիտի լիներ այլ թիմերից անասնագողություն կատարելը, ինչպես որ կատարվեց Երևանի ավագանու ընտրություններից հետո, 2023 թվականին: Առանց այդ անասնագողության՝ Ավինյանը չէր կարող ընտրվել քաղաքապետի պաշտոնում:

Սակայն, նույնիսկ այդ դեպքում, իրենց գոնե անհրաժեշտ է հրապարակային դաշնակից, որի հետ ՔՊ կկարողանա կնքել քաղաքական դաշինք, ինչպես որ Երևանում նույն ՔՊ-ն կնքեց Արամ Զավենիչի կուսակցության հետ:

Գյումրու «արամ  զավենիչի» դերը, ըստ Փաշինյանի,  պիտի կատարեն նույնանման ձևով Գյումրիի «եվրադրածոները», ինչի համար էլ այսօր, Փաշինյանի հրահանգմամբ, նրանք հայտարարեցին, որ մասնակցելու են Գյումրու ավագանու ընտրություններին:

Հասկանալի պատճառով, Գյումրիում նրանք բավարար ձայներ չունեն: Իրենց տեղը այդ ձայները պիտի հավաքի Նիկոլ Փաշինյանը, ինչպես որ դա եղավ Երևանում 2023-ին, որպեսզի դրանից հետո ապագա ՔՊ-եվրադրածոներ դաշինք կնքվի և հնարավոր լինի, արտաքին աշխարհի համար, հայտարարել, որ Գյումրիում անցկացվեցին «քաղաքակիրթ դեմոկրատական ընտրություններ»:

Սակայն ինչպես ասում են, «պապը երկրորդ անգամ փլավ չի ուտում» և երևանյան ընտրությունների  արդյունքների կրկնությունը  Գյումրիում Փաշինյանին չի հաջողվի արձանագրել:

Նախ, 2023-ի սեպտեմբերին դեռ Արցախը ամբողջովին հանձնած չէր, և Ալիևի հետ պայմանավորված, այն հանձնվեց 2023-ի ավագանու ընտրություններից ուղիղ երկու օր հետո, որպեսզի Փաշինյանը քաղաքական իմաստով այդ ընտրություններում չտուժեր:

Երկրորդն այն է, որ երևանյան ընտրության արդյունքները արդեն բոլորի համար ցույց տվեցին, թե ինչ աստիճանի դրածոատիպ են այդ «եվրո»  կոչված ուժերը:

Իրականում դրանք Եվրոպայի հետ ոչ մի կապ չունեն, դրանք  կազմվել են, որպեսզի աջակցեն Փաշինյանին Հայաստանը դուրս բերելու այս աշխարաքաղաքական համակարգից և տեղավորելու Թուրքիայի ազդեցության տիրույթում:

Դա արդեն Հայաստանում հասկացել են նույնիսկ դպրոցականները:

Եվ այդ իմաստով, հասկանալի է, որ Գյումրիում Նիկոլ Փաշինյանի այս հատուկ քաղաքական օպերացիան արդյունքի չի հասնի և  «ՔՊ-ի  Սարիկն» այդպես էլ չի ընկալվի, որպես «գյումրեցիների Սարիկ»:

Ինչ վերաբերվում է այս եվրաթրքական միավորմանը, ապա նրանք առավել ևս չեն կարողանա փրկել Սարիկին, քանի որ ժամանակներն  արդեն անշրջելիորեն փոխվել են, և Աշխարհում, և Հայաստանում ճիշտ հակառակ քաղաքական թրենդի ալիքն է գալիս:

Սա է իրականությունը:

Դավիթ Մկրտչյան
Zham.am