Վազգեն Սարգսյանի կերպարը կերտելու վրա շատ եմ աշխատել. Խորեն Լևոնյան

«Յուրաքանչյուր դերասանի համար դժվար է կերտել պատմական կերպարի՝ լինի դրական, թե բացասական, սակայն դա մեր գործն է, պետք է անենք»,- ասուլիսում ասաց
«Վազգեն. Վերջին սպարապետը» ֆիլմիում  Վազգեն Սարգսյանի դերակատար Խորեն Լևոնյանը։

Ինչ վերաբերում է Վազգեն Սարգսյանի կերպարը կերտելուն՝ նա նշեց, որ դրա համար շատ է աշխատել, շատ ընդհնարություններ է նկատել. «Եթե կարելի է, մի քիչ գլուխ գովեմ, մեր մեջ շատ ընդհանրություններ եմ նկատել։

Իրականում մեր  ընտանիքների  բարեկամությունը շատ վաղուց է սկսվել, իմ պապի հետ ընտանիքներով, հետագայում շատ շփվել ենք, և ես միշտ ընդհանրություններ եմ գտել։

Փորձել եմ 100 տոկոսանոց աշխատել և փորձել եմ ինչքան ուժ ու եռանդ ունեմ, դնեմ այս ֆիլմի մեջ։ Փորձել եմ չկրկնօրինակել, որ չվերածվի տնազի, այլ մի փոքր ուրիշ տեսանկյունից անել»։

Խորեն Լևոնյանն ասաց, որ մշտապես պատրաստ է եղել նմանատիպ կերպարների, գաղափարների. «Մեծ ափսոսանք եմ հայտնում, որ չկան մեր հերոսների, լեգենդների, արժանի մարդկանց մասին շատ ֆիլմեր։

Վազգեն Սարգսյանի նման կեպարներ հազար տարին մեկն են ծնվում։ Փորձել եմ հասկանալ միտքը, հոգին, ինչ տեսակ  տղամարդ էր, ինչպես էր մտածում։  

Շատ-շատ նյութեր դիտելուց հետո նորից եկանք այն համոզման, որ մենք, կարծես չէ, առաջնորդ չենք սիրում, փորձում ենք ամեն կերպ ապացուցել, որ մենք իրենցից ավելի շատ ենք հասկանում, կարող ենք իր տեղը լինել։ Նույնը ինչ կատարվեց իմ պապի՝ Խորեն Աբրահամյանի հետ»։ 

Նա նշեց, որ չի տեսել դեռ այնպիսի քաղաքական գործչի, որի խոսակցական հայերենն այդքան հայեցի լիներ, մատչելի ու հասկանալի լսողի համար, ինչպիսի Վազգեն Սարգսյանի խոսակցականն էր. «Ցավոք սրտի, մնացածն ով խոսում է, ինչ որ հայերեն բառեր են ասում, մտքեր են արտահայտում, իմ կածիքով, այդքան չեմ հասկանում՝ ինչ են խոսում։ Բայց Վազգեն Սարգսյանի հայերենը ... Այդպես մեր մեծեր էին խոսում։ Բախտ եմ ունեցել իմ պապիկի շնորհիվ շփվել մեր մեծերի հետ, տեսել եմ՝ ինչպես պետք է խոսել հայերեն ու պահել, պահպանել այն»։ 

Ֆիլմում Վազգեն Սարգսյանի մոր՝ Գրետա մայրիկի կերպարը մարմնավորել է Մարջան Ավետիսյանը։ Նա նշեց, որ իր համար չափազանց մեծ է պատասխանատվություն հանդես գալով այդ կարևոր դերում. «Շատ կարևոր կերպար է եղել ոչ միայն իր ընտանիքի, Վազգենի համար, այլ հայ ազգի համար։ Իզուր չէ, որ ասոմ են Գրետա մայրիկը բոլորի մայրիկն է։

Եթե Խորեն Լևոնյանին փրկում է արտաքին նմանությունը, իմ դեպքում չափազանց դժվար էր, դիմահարդարների և այլ մասնագետների շնորհիվ ենք փորձել ստանալ կերպարը։

Հուսամ, որ կարողացել եմ փոխանցել Գրետա մայրիկի մեծ սերը ընտանիքի, որդու և հայրենիքի հանդեպ, որն ունեցել է»,-ասաց դերասանուհին։
Ֆիլմի սցենարի հեղինակ Լևոն Գալստյանը խոսեց Վազգեն Սարգսյան-գրողի մասին. «Բոլոր սերուդներին էլ հայտնի չէ Սարգսյանի կարևոր կողմը՝ նրա գրականությունը, ինչի համար ափսոսում եմ։ Ուրախ եմ, որ այս ֆիլմը հնարավորություն կտա ծանոթանալու նրա գրականության որոշ պատառիկների, որոնք, ըստ էության, նրա կերպարի մի մասն են, բացում են շատ հետաքրքիր շերտեր այդ մարդու՝ որպես գրողի աշխարհայացքի, մտածողության, աշխարհի ընկալման, ընդհանրապես մարդկանց նկատմամբ վերաբերմունքի, կնոջ, հայրենիքի նկատմամբ վերաբերմունքի։ Նրա գրականությունը շատ բազմաշերտ է»։
Աղբյուր` Panorama.am