Գյումրի ՔՊ-ի ԺՊ՝ Սարիկ Մինասյանը ավինյանական «ասեք՝ կանենք»-ով է փորձում գյումրեցիներին խաբել, որ հետո դրժի իր խոստումները

Ինչպես հայտնի է, մարտի 30-ին Գյումրիում պիտի անցկացվեն քաղաքի ավագանու ընտրություններ, որին մասնակցելու է նաև իշխանությունը՝ քաղաքապետի ԺՊ նշանակած Սարիկ Մինասյանի դեմքով:

Ինչքան էլ որ ասեն, թե՝ «մեր Սարիկը» անկուսակցական է, միևնույն է, նա համաձայնվել է դառնալ ՔՊ-ական և ուրեմն՝ իր վրա է վերցրել նաև ՔՊ-ի բոլոր բացասական բարքերի բեռը:

Իսկ այդ բարքերից ամենահայտնին, ՔՊ-ի խաբեությունն է, առաջին հերթին՝ իր ընտրողներին:

Հիշենք, թե ինչ էր խոստանում Տիգրան Ավինյանը Երևանի ավագանի ընտրությունների ժամանակ:

Նրա գլխավոր կարգախոսը այն ժամանակ. «Ասեք՝ կանենք»-ն էր:

Նրանք շրջում էին Երևանի թաղերով և խոստանում քաղաքացիներին, թե ինչ ցանկություն որ ունեն, կլուծվի, եթե իրենց թեկնածուն ընտրվի քաղաքապետի պաշտոնում:

Թե ինչ կատարվեց դրանից հետո, բոլորին է հայտնի: Սակայն դա առավել հայտնի է երևանցիներին: Գյումրեցիները այդ ոճին միգուցե անդրադառնան ընտրություններից հետո, երբ ՔՊ-ի թեկնածուն կարողանա ավինյանական ոճով խաբել իր համաքաղաքացիներին:

Օրինակ, տրանսպորտի ուղեվարձի թանկացման մասին Ավինյանը մինչ ընտրությունները չէր խոստանում քաղաքացիներին: Չէր հայտարարում, որ քաղաքի կենտրոնի կարմիր գծերը պիտի թանկացնեն 13 անգամ: Չէր խոստանում, որ քաղաքի բոլոր առևտրի օբյեկտների տուրքերը պիտի բարձրացներ:

Ճիշտ հակառակ խոստումներով էին հանդես գալիս:

Ընտրվելուց հետո,  Ավինյանն ու իր թիմը  180 աստիճան փոխեցին իրենց մոտեցումները: Այսինքն՝ խաբեցին երևանցիներին բոլոր առումներով:

Հիմա հերթը հասել է Գյումրիին:

Հիմա Գյումրու «ավինյանը»  ընտրություններից առաջ խոստանում է, որ.

-տրանսպորտի գինը չի բարձրանա,

-մարդկանց գույքահարկը չի բարձրանա:

Գյումրիի «ավինյանի»  այս խոստումները լսելիս երևանցիների ծիծաղը կարող է գալ: Սակայն գյումրեցիները ավելի հումորով ժողովուրդ են, և իրենց խաբելն ավելի դժվար կլինի:

Գյումրիի այսօրվա ԺՊ-ն հայտարարում է, թե  ներկայիս քաղաքում գործող 89 միկրոավտոբուսների աշխատանքը կերկարացվի մինչև 21.30, իսկ հետագայում նաև մինջև 22.00:

Հարց կարող է առաջանալ. պարոն Սարիկ Մինասյանը ընտրությունների՞ն  է սպասել, որ մարտի մեկից այդպիսի որոշում է ուզում ընդունել:

Ի դեպ, Գյումրուն ընդամենը 89 միկրոավտոբուս ունենալը շատ քիչ է:

Պաշտոնական տվյալներով՝ քաղաքում ապրում է մոտ 150 հազար մարդ: Իսկ դա նշանակում է, որ նման քանակի համար անհրաժեշտ է մոտ 80 հատ 40-60 տեղանոց ավտոբուս, կամ՝ առնվազն 160  միկրոավտոբուսային շարժակազմ:

Դա ապահովելը դժվար գործ չէ:

Բավարար է արձանագրել, որ օրինակ Երևանի ավտոբուսային պարկի վերափոխման արդյունքում հսկայական քանակի 20-40 տեղանոց ավտոբուսներ են ազատվել: Դրանց օգտագործումը Գյումրիում հնարավորություն կտա  քաղաքի տրանսպորտի աշխատանքները երկարացնել նույնիսկ մինչև 23.00-ն:

Միայն դրանից հետո, հնարավոր կլինի քաղաքում կազմակերպել երեկոյան հանգստի միջավայր:

Այս խնդրի լուծման համար ոչ շատ ռեսուրս է պետք, ոչ էլ շատ խելք: Պիտի լինի կամք և պատասխանատվություն՝ գյումրեցիների նկատմամբ, որ այս տարրական խնդիրը լուծվի:

Էլ չենք ասում, որ արդեն մեկ տարուց ավել է, ինչ 5 էլեկտրոբուսներ, որոնք որպես նվեր ստացել էր Գյումրին, մինչ այսօր, բյուրոկրատական քաշքշուկների պատճառով չեն մտցվել քաղաքային տրանսպորտային ցանց, ինչը իսկական խայտառակություն է:

Մնացած քաղաքային խնդիրների մասին կխոսենք այլ հոդվածներում:

Իսկ գյումրեցիներին կոչ կանենք չհավատալ արդեն մեկ անգամ խաբած ՔՊ-ական իշխանության ներկայացուցիչներին:

Արմեն Կիրակոսյան