«էս իշխանության գերնպատակը Հայաստանը դատարկելն է»,-շիրակցի ֆերմեր

«Հրապարակ»-ը գրում է. «Մի քանի օր է՝ Շիրակի մարզի անասնապահներն ու մսավաճառները ոտքի են կանգնել, փորձում են իրենց բողոքի ձայնը լսելի դարձնել իշխանավորներին, բայց դեռևս ապարդյուն է։Այսօր էլ Շիրակի մարզպետարանի շենքի դիմաց հավաքված անասնապահները հանդիպում պահանջեցին մարզպետից՝ հիշեցնելով մարզում առկա լուրջ խնդիրը․ Շիրակի մարզի սպանդանոցները չեն գործում, ինչը անասնապահների ու մսագործների համար անասելի խնդիր է առաջացրել։

Նրանք պնդում են, որ անհնար է կես տոնա կշռող անասունին մեքենայով տանել հարևան մարզի սպանդանոց, որպեսզի մորթ իրականացվի։ Շիրակցի ֆերմեր, անասնապահ Տիգրան Ավագյանը hraparak.am-ի հետ զրույցում ներկայացնում է իրավիճակը՝ ընդգծելով, որ ներկայիս իշխանությունը , արհեստական խոչընդոտներ ստեղծելով , քրտինքով ապրող գյուղացու հացն է արդեն կտրում, որ հուսահատված ու անելանելի վիճակում հայտնված քաղաքացին վաղը փակի իր տան դուռը, եւ Հայաստանը վերջնականապես դատարկվի։

«Այսօր մարզպետը կառավարության նիստի էր, փոխանցել է, թե վաղը առավոտյան պատրաստ է ընդունել մեզ, նստենք, խոսենք։Էս իշխանությունը հենց փոխվեց, մարզպետարանի ամբողջ պարգևավճար, ռոճիկ պիտի ետ գանձվի։ Գյուղվարչության պետը մի քանի օր առաջ ասել է, թե իբր 62հզր․ գլուխ անասուն է մարզում մնացել, նվազում կա, ցանքատարածության նվազում կա, եւ էս դեպքում, երբ իր ոլորտը բացահայտ անկում է ապրում, ինքը պարգևատրվում է, չի կարող էդպես լինել։ Դա հարամ փող է։ Իր պատասխանատվության ոլորտում վիճակը վատ է, իսկ ինքը պարգևատրվում է։ Իսկ ինչ վերաբերում է բուն՝ սպանդանոցների խնդրին, ես ասեմ, որ իրենք խորը թքած ունեն, թե էդ ցուլիկը սպանդանոցում, գետնին, թե եսիմ որտեղ է մորթվում, իրենց ուզածը գյուղացու ջեբը մտնելն է, նպատակն էդ է, թե չէ ոչ մարդկանց առողջության, ոչ էլ սանիտարահիգենիկ պայմանների դարդը չեն։ Էդ որ ասենք՝ մատաղ ես անում, մի 100 հոգու ազգուտակիդ միս ես բաժանում, էդ ժամանակ նորմալ է իրենց համար , ոչ մի վտանգ չկա, բայց հենց պիտի վաճառես, սպանդանոց․․․։ էս, ինչ հիմա կատարվում է, փողի բազար է։ Սպանդանոցից են խոսում, բայց օրինակ դաշտի մեջ կովը ուռում է, պիտի շուտ մորթես, դա նորմալ միս է, բայց որ մնաց կովը պայթեց, դա արդեն վաճառքի ենթակա չէ։ Տեսեք՝ բերել կովերին համարակալել են, ոնց որ հայտարարագրած լինեն, հաշվիչ են դրել էլի, որ հենց անասունը մորթվի, մտնի սպանդանոց, որտեղից մսավաճառը պիտի առնի։ Տեսեք՝ միսը քանի ձեռք է անցնելու ու ինչքան թանկանա։ Մի հատ մտնի սպանդանոց, որը ծախս է, մսավաճառն էլ իր գինն է դնելու, որ ծախի, իսկ պետությունն էլ ամեն մեկից 10-20 տոկոս հարկելու է։ Ամենաուժեղ չագուճի հարվածը գյուղացին նոր պիտի ուտի․ եթե հիմա միսը ֆակտուրով եղավ, ասենք՝ վաճառել է, կազմել է 500 հզր դրամ, ստիպում են մարդկանց հայտարարագիր լրացնել, եկամուտ են հաշվելու, ասելու են՝ 20-30 տոկոս պիտի տաս։Էսքանից հետո ոնց անմասն մնաս, տունը նստես, ասես՝ ամեն ինչ լավ է։ Թե չհասկացավ էս իշխանությունը, իրենը արեց, իմացեք, որ կամաց-կամաց մսի խանութները վարի կեթան, մարդիկ գյուղերում միս առնելուց ցուցակագրվում են, մեկը՝ 5կգ, մյուսը 10, մորթողը կմորթի, իրար մեջ կբաժանեն յոլա կեթան, բայց էդ ճիշտ չի, 60 տոկոս անասնապահությունը նվազել է, գյուղերը դատարկվում են, էս իշխանության գերնպատակը Հայաստանը դատարկելն է »,- hraparak.am-ին ասաց շիրակցի ֆերմերը։