Ադրբեջանական և թուրքական ԶԼՄ-ները հրճվանք են ապրում Փաշինյանի խոսքերից ցեղասպանության վերաբերյալ իսկ աշխարհը զարմացած է...

Ինչպես հայտնի է Դավոսում գտնվելու ժամանակ Փաշինյանը հանդիպել էր տեղի հայ համայնքի ներկայացուցիչների հետ և շատ հեռու գնացող միտք էր հայտնել այն մասին, թե ինչու աշխարհը սկսեց Թուրքիայից պահանջել 1915-ի հայոց ցեղասպանության ճանաչումը։

«Մենք պետք է վերադառնանք նաև Հայոց ցեղասպանության պատմությանը։ Պետք է հասկանանք, թե ինչ եղավ և ինչու եղավ։ Իսկ մենք ինչպես ենք դա ընկալել, ում օգնությամբ։ Ինչպե՞ս եղավ, որ օրինակ, 1939-ին ցեղասպանության օրակարգ չկար, բայց արդեն 1950-ին այն հայտնվեց օրակարգում»,- նշել էր Փաշինյանը այդ հանդիպման ժամանակ։

Ադրբեջանական և թուրքական լրատվամիջոցները հատուկ ուշադրություն են դարձնում այն հանգամանքի վրա, որ Փաշինյանը մինչ այդ էլ հայտարարել էր, թե իբրև ցեղասպանության ճանաչման օրակարգը ԽՍՀՄ-ի ժամանակ հատուկ էր բերվել, որպեսզի խորհրդային Հայաստանում առաջ գար վախ Թուրքիայի հանդեպ և դրանով իսկ փակվեր հետագայում անկախության համար գաղափարի պայքարը:

Ավելին, ըստ Փաշինյանի, հայ մտավորականների կողմից ցեղասպանության թեման իրենց աշխատություններում օգտագործելը նույնպես եղել է խորհրդային իշխանությունների պատվերի շրջանակներում:

Ադրբեջանցիները նշում են, որ Փաշինյանը հետևողական է տանում իր այս թեզը և որի ապացույցն է նաև այն, որ նաև երեկվա իր հարցազրույցում Փաշինյանը կրկին հակադրեց Արարատի և Արագածի սիմվոլները, որպեսզի կարողանա ապացուցել հարևաններին, որ իր մտադրությունը Հայաստանը դուրս բերել ռուսական ազդեցությունից և մտցնել Թուրքիայի ազդեցության տակ առավել քան անկեղծ է:

Հետաքրքիր է, որ նույնիսկ այդքանից հետո ադրբեջանցիները առաջ են քաշում նոր զիջումների պահանջ, նշելով, որ հաջորդ փուլում Փաշինյանից պետք է պահանջել ոչ միայն հայոց ցեղասպանությունից հրաժարվելը, այլ նաև ճանաչելը, որ ժամանակակից Հայաստանում կատարվել է ադրբեջանցիների ցեղասպանությունը:

Որպես առաջին քայլ, ադրբեջանցիները պահանջում են, որ Փաշինյանը ճանաչի այդ գործընթացը, որպես «էթնիկ զտումներ» և սկսի բանակցությունները, այսպես կոչված «Արևմտյան Ադրբեջանի» ներկայացուցիչների հետ:

Իսկ թե ինչու է Փաշինյանը փորձում կյանքի կոչել Ադրբեջանի օրակարկգը, կներկայացնենք մեր հաջորդ վերլուծությունում:

Դավիթ Մկրտչյան