Անհետ կորածների ծնողները խորհրդարանական լսումների կմասնակցեն

«Ժողովուրդ» օրաթերթը գրում է.

«Խորհրդարանում 44-օրյա պատերազմում անհետ կորած զինվորների ծնողների մասնակցությամբ լսումներ կլինեն: Հիշեցնենք, որ հունվարի 10-ին անհետ կորած զինվորների ծնողները գնացել էին ԱԺ պաշտպանության հարցերի մշտական հանձնաժողովի նախագահ Անդրանիկ Քոչարյանի հետ հանդիպման. վերջինս նախ գոռգոռացել էր ծնողների վրա, հետո, ստանալով համարժեք պատասխան, խաղաղվել էր: «Ժողովուրդ»-ը գրել էր, որ այդ հանդիպումը շատ թեժ է անցել, զինվորների ծնողները շատ վրդովված են եղել ու խստորեն պահանջել են, որ իրենց որդիների ճակատագրի մասին հստակ տեղեկություններ վերջապես տրամադրեն: Անդրանիկ Քոչարյանն էլ ծնողների զայրույթը պարպելու համար խոստացել էր այդ հարցով ԱԺ-ում լսումներ կազմակերպել:

«Ժողովուրդ» օրաթերթի տեղեկություններով՝ լսումները, հնարավոր է, տեղի ունենան հաջորդ շաբաթ: ԱԺ լսումներին հրավիրվելու են նաեւ տարբեր գերատեսչությունների ղեկավարները՝ ԱԳ նախարար, ՊՆ նախարար, ԱԱԾ տնօրեն, գլխավոր դատախազ եւ այլ բարձրաստիճան պաշտոնյաներ: Թե ինչ արդյունք կտան լսումները, բարդ է ասել. համենայնդեպս, նախորդ նմանատիպ լսումներից հետո ուժային կառույցները «հրաժեշտի ՍՄՍ» ստացան:»:

Առավել մանրամասն թերթի այսօրվա համարում