Աշնակի մշակույթի տան պատից ջնջել են Նժդեհի ու Մոնթեի նկարները, ինչ-որ «տանցոռների» պատկերներն են «նախշելու». նիկոլականները ցնծության ու հրճվանքի մեջ են

«Առավոտ»-ը գրում է. Թալին խոշորացված համայնքի Աշնակ վարչական շրջանի մշակույթի տան պատից օրերս «մաքրվել» են Նժդեհի եւ Մոնթեի նկարները: Միջադեպն անաղմուկ չի անցել. տեղացիներն ընդվզել են, անհամաձայնություն են հայտնել, «միջոցառումն» իրականացվել է վեճի հասնող խոսքուզրույցով:

Այս ամենի արդյունքում, վարչական շրջանի ղեկավար Սասուն Դավթյանն էլ հրաժարականի դիմում է ներկայացրել: Դիմումն ընդունվել է խոշորացված համայնքի ղեկավարի կողմից եւ 13 տարի Աշնակը ղեկավարած նախկին գյուղապետ-վարչական շրջանի ղեկավարն այլեւս չի պաշտոնավարի: «Ռեմոնտ էին անում, էդտեղ ներկել են, որ մեր՝ Աշնակի պարի խմբի նկարը էդտեղ դնեն»,- մեր տեղեկության, այսպես ասած, պաշտոնական վարկածը Aravot.am-ի հետ զրույցում ներկայացրեց Սասուն Դավթյանը:

Իսկ դիտարկմանը՝ փաստորեն, վերանորոգման անվան տակ այդ նկարները ներկվել- փակվել են, որպեսզի հետո այլ նկար տեղը դրվի ու ստացվում է, որ Նժդեհի եւ Մոնթեի նկարները հանվել են, նա արձագանքեց. «Հիմա ես չգիտեմ… որ տեսանկյունից… ով ոնց է մտածում, ինչ է մտածում… Ամեն դեպքում, միտքը դա է, որ այդտեղ Աշնակի պարի խմբի նկարը պետք է նկարվի ու քանի որ հիմա էին անում վերանորոգումը, ներկել են, որ հետո խմբի նկարը նկարեն, այդ նկարներն էլ տանեն ուրիշ տեղ նկարեն: Երեւի չգիտեմ… Մենք շենք ունենք, Գեւորգ Չավուշի թանգարան. էնտեղ երեւի կնկարեն»:

Մեր ճշտող հարցին՝ երեւի՞, թե՝ կտեղափոխվեն այդ նկարները, Սասուն Դավթյանը պատասխանեց. «Ես արդեն չգիտեմ, ես էլ չեմ աշխատում: Ուզում եմ ասեմ՝ ես ի՞նչ իմանամ, էլ կնկարեն, չեն նկարի, էդ արդեն իրենք կարան պատասխանեն»:

Իր պաշտոնանկության պաշտոնական վարկածն էլ մեր զրուցակիցը ներկայացրեց իր հոգնածությունը, թեեւ չհերքեց, որ նկարների թեմայով խոսակցություն եղել է ու ինքն էլ դեմ է եղել այդ նկարների փոխարեն այլ նկար նկարելուն. «Ամեն դեպքում, հա խոսակցություն գնացել է, հետո՝ էդպես…»: Փորձեցինք զրուցել նաեւ Թալին խոշորացված համայնքի ղեկավար Տավրոս Սափեյանի հետ: Մեր հեռախոսազանգերին նա դեռ չի արձագանքել: