Մեր ժամանակների հակահերոսները

2018–ից հետո Նիկոլ Փաշինյանը մի դեմագոգիկ և պոպուլիստական մրցանակաբաշխություն հորինեց։ Անունը դրեց «Մեր ժամանակների հերոսը»։

«Մեր ժամանակների հերոս» էին դարձնում, այսպես ասած, հասարակ մարդկանց՝ «հպարտ քաղաքացիներին»։ Ավելի ճիշտ՝ Բաբկենի հարևան Պողոսի պեսներին։ Նպատակ ունեին ցույց տալ, թե, իբր, իրենք հակաօլիգարխիկ են, պողոսների բարեկամն են։

Ժամանակի ընթացքում «մեր ժամանակների հերոսը» դարձավ ներիշխանական մթնոլորտը բացահայտող հարթակ։ Կախված նրանից, թե ովքեր էին ներկա գտնվում իշխանական համակարգից, ովքեր էին մրցանակները հանձնում, ովքեր էին ելույթ ունենում, որոշվում էր ներիշխանական համակարգում տվյալ մարդու դիրքը կամ դիրքերի թուլացումը։ Պողոսները ֆոնային դերակատարում ունեն այդ էժանագին շոուի մեջ։

Եթե նախորդ տարիները վերցնենք, ապա կտեսնենք, թե որքան է «թարմացվել» իշխանական վերնախավի պատկերը մրցանակաբաշխության դահլիճում։ Մրցանակաբաշխությանն արդեն չկան տխրահռչակ Կարեն Անդրեասյանը, նախկին նախարար Վահան Քերոբյանը, էլի շատերը։

Այս տարվա մրցանակաբաշխությանը ներկա չէր Երևանի քաղաքապետ նշանակված Տիգրան Ավինյանը։ Նրան «ֆուկ» էին արել։ Դա շատերին թույլ տվեց ենթադրել, որ նրա հարցերը շուտով լուծելու է Նիկոլը, «ժերտվա» է տալու, քանզի Ավինյանի հայրը նիկոլենց գաղտնիքը բացահայտել է։

Գաղտնիքն այդ վերաբերում է պողոսներին։ Նիկոլենք վերջիններիս խաբում են, թե, իբր, նրանց համարում են «հպարտ քաղաքացի» ու նեղվում են, երբ նրանց «ժեխ» են ասում։ Մինչդեռ Ավինյանի հայրն անկեղծորեն հայտարարեց, որ նիկոլենց համար պողոսները «Գեղի «Օփելով» համբալներ» են։ Դա Նիկոլի համար վտանգավոր է, քանզի ինքն «Անասնաֆերմայի» Նապոլեոն խոզի պես է ապրում և փորձում է այդ ստեղծագործության մոտիվներով իրեն հավատացող «ոչխարներին» համոզել, որ ամեն ինչ ճիշտ է և պահպանվում են հեղափոխության արժեքները։

Ավինյան Տիկոյի հայրը քաշեց որդուն, քաշեց նիկոլենց, բայց նաև օգուտ տվեց հայ ժողովրդին՝ «կույրերի» համար բացահայտերով, թե ովքեր են մեր ժամանակների հակահերոսները։

Կորյուն Մանուկյան
7or.am