Փաշինյանը՝ սպանում է, Սիմոնյանը՝ թքում, Ավինյանի հայրը՝ վիրավորում

Նիկոլ Փաշինյանի սիրած նախադասություններից մեկը սա է. «Սիրում եմ բոլորիդ, հպարտանում եմ բոլորովդ, խոնարհվում եմ բոլորիդ առաջ»: Դա մեծագույն խաբեություն է: Իրականությունը լրիվ հակառակն է: Իր ու իր նեղ թիմի անդամների վարքագիծն ասվածի ապացույցն է:

Նիկոլը 44-օրյա պատերազմից հետո հայտարարեց, որ ինքը կարող էր պատերազմից խուսափել: Արդյունքներն, ըստ իրեն, նույնն էին լինելու, բայց առանց զոհերի: Պարզապես այդ դեպքում իրեն կասեին «Նիկոլ, դավաճա՛ն»: Ու որպեսզի դա չասեին, ինքը հազարավոր զոհեր տվեց:

Նիկոլի կողակից Աննա Հակոբյանն էլ հայտարարում էր, որ զինվորները մինչև 44-օրյա պատերազմը զոհվել են հանուն ոչնչի: Իր զուգընկեր Նիկոլն ամեն ինչ արեց, որպեսզի 44-օրյայի զոհերն էլ հանուն ոչնչի լինեն՝ Արցախը դավաճանաբար ճանաչելով Ադրբեջանի մաս:

ԱԺ նախագահ աշխատող Ալեն Սիմոնյանը հրահանգում է իր թիկնազորին «հպարտ քաղաքացու» ձեռքերը բռնել, որպեսզի ինքը թքի այդ քաղաքացու վրա: Մինչև այդ իր մայրն էր պատշգամբից նույն բանն անում ու միջնամատ ցույց տալիս քաղաքացիներին:

Քաղաքապետի լիազորություններն ապօրինաբար ստանձնած Տիգրան Ավինյանի հայրն էլ նույն գծի մեջ հանդես եկավ: Նա «համբալ» անվանեց «գեղի օփելներով» Երևանի կենտրոն եկող ու խցանում ստեղծողներին:

Եվ այսպես, Նիկոլի իրական կարծիքը քաղաքացիների մասին ժեխային է: Իրենք ձև էին տալիս, թե, իբր, պաշտպանում են իրենց կողմնակիցներին, երբ վերջիններիս հասցեին որոշ մարդիկ հնչեցնում էին «ժեխ» ձևակերպումը: Պարզվեց, որ դա բլեֆ է, քանզի իրենք իրենց կողմնակիցներին (այդ մարդկանց մի մեծ հատված «Օփել» մակնիշի ավտոմեքենա է քշում) համբալ են համարում: Իրենք այդ «համբալների» հաշվին են եկել իշխանության, ձեռքները մտցրել են պետական ու համայնքային բյուջեի մեջ և անխնա թալանում են «համբալներին»:

Ահա՛ այն ամենը, ինչ պետք է իմանալ նիկոլենց մասին: Տիգրան Ավինյանի հայրն ընդամենը անկեղծացել է: Նա տան խոսակցություն է դուրս հանել: Բա որ «համբալներն» իմանան, թե ինչ են անում Նիկոլն ու Աննան իրականում, ապշելու են: Բայց դա իշխանափոխությունից հետո: Երբ «հերձումն» ամբողջությամբ ցույց կտա սրանց ոչ միայն թուրքամետ բոլոր քայլերի էությունը, այլ նաև կբացահայտի թալանի մասշաբները:

Հայկ Ուսունց
7or.am