Ցուցադրաբար «պադավատ» կրճատողին տեսեք. Փաշինյանին սպասարկող մեքենաների քանակը պետական գաղտնիք է. «Փաստինֆո»

Փաշինյանին սպասարկող մեքենաների քանակը, ինչպես նաև՝ այդ մեքենաների ձեռքբերման ու սպասարկման համար հատկացված միջոցները պետական գաղտնիք են։ Այս մասին հայտնել են վարչապետի աշխատակազմից՝ ի պատասխան «Փաստինֆոյի» հարցման։

«Մենք դեկտեմբերի 6-ին Արայիկ Հարությունյանին ուղղված հարցմամբ աշխատակազմի ղեկավարին խնդրել էինք հայտնել, թե քանի ծառայողական մեքենա է սպասարկում ՀՀ վարչապետին, թե վերջին 3 տարիների ընթացքում քանի մեքենա է ձեռք բերվել վարչապետին սպասարկելու համար, որքան գումար է հատկացվել այդ մեքենաների ձեռքբերման համար, որքան է կազմում այդ մեքենաների տարեկան սպասարկման գումարը։ Այս հարցերից որևէ մեկին պատասխան այդպես էլ չենք ստացել։

Այսօր ստացված գրության մեջ, հղում անելով «Պետական գաղտնիքի մասին» ՀՀ օրենքի 8-րդ հոդվածին, ասել են, թե այդ տեղեկատվությունը դասվում է պետական գաղտնիքի շարքին։ Ասել է թե՝ հարկատուները չեն կարող իմանալ, թե իրենց հարկերից որքան գումար է ծախսվում Փաշինյանի մեքենաների համար։

Փոխարենը մասամբ պատասխանել էին մեր մյուս հարցերի, թե ընդհանուր առմամբ քանի ծառայողական մեքենա է սպասարկում կառավարությանը, կառավարության որ պաշտոնյաներին են դրանք սպասարկում, որ պաշտոնյաների սպասարկման համար են վերջին 3 տարվա ընթացքում նոր մեքենաներ ձեռք բերվել ու որքան գումար է հատկացվել այդ նպատակով։ Նոր գնված գնված մեքենաների վերաբերյալ տեղեկատվություն, իհարկե, չկար, սակայն մեզ հայտնել էին, որ վարչապետի աշխատակազմին սպասարկում է 26 տրանսպորտային միջոց։

Ըստ մեզ տրամադրած տեղեկատվության՝ մինչ նոյեմբերի 22-ը, երբ Նիկոլ Փաշինյանը Հանրային հեռուստաընկերությանը տված հարցազրույցից առաջ հրապարակած տեսանյութում կրճատում էր ծառայողական ավտոմեքենաների թիվը՝ վարչապետի աշխատակազմին սպասարկում էր 40 ավտոմեքենա, նոյեմբերի 22-ից հետո՝ նրանց թիվը կրճատվել էր 13-ով և դարձել 27։ Կառավարությունից մեզ պարզաբանեցին, որ նախորդ 3 օրերի ընթացքում մեքենաներից ևս մեկը դուրս էր գրվել աշխատակազմի ավտոպարկից։

Ստացվում է, որ ըստ հարցման՝ այսօր վարչապետի աշխատակազմին սպասարկում է 26 ավտոմեքենա՝ այն դեպքում, երբ մինչև նոյեմբերի 22-ը նրանց թիվը 40-ն էր։ Այս կրճատումը կարող էին տպավորիչ լինել, եթե չլիներ մի մեծ բայց....

Բանն այն է, որ «Փաստինֆոն» համանման հարցում էր կատարել նաև 5 տարի առաջ՝ 2019 թվականին, երբ Փաշինյանի աշխատակազմի ղեկավար էր Էդուարդ Աղաջանյանը:

Ըստ այդմ՝ մայիսին կառավարությունից ստացած հարցման պատասխանում այն ժամանակ վարչապետի աշխատակազմի ղեկավար Էդուարդ Աղաջանյանը հայտնել էր, որ 2019թ. հունվարի 1-ի դրությամբ վարչապետի աշխատակազմին սպասարկել է 43 ծառայողական ավտոմեքենա, իսկ ապրիլի 1-ի դրությամբ 10 մեքենա, ևս 7 մեքենա գործում է որպես հերթապահ։ Հերթապահ 7 մեքենաների շահագործումը սկսվել է 2019 թվականի մարտի 30-ին։ Ըստ այդմ՝ «Հերթապահ ավտոմեքենաները տրամադրվում են համաձայն ներկայացված զեկուցագրի՝ աշխատակազմի ղեկավարի հանձնարարությամբ, գործերի կառավարչի թույլտվությամբ գրավոր հայտի հիման վրա»,- նշված էր պատասխանում։

Ստացվում է, անցած 2019 թ-ի համեմատ կառավարության աշխատակազմին սպասարկող տրանսպորտային միջոցների քանակն ավելացել է, ոչ թե կրճատվել, եթե 2019-ին վարչապետի աշխատակազմին սպասարկում էր 17 տրանսպորտային միջոց, ապա 2024թ. նոյեմբերի 22-ին հանրայինի եթերում կացնային կրճատումների մասին հայտարարությունից հետո, դրանց թիվը դարձել է 26։
Ի դեպ, նշենք, որ 2019 թվականին «Փաստինֆո»-ի հարցմանն ի պատասխան տրամադրվել էին նաեւ ծառայողական մեքենաների մակնիշները ու թե որքան վառելիք է հատկացվում յուրաքանչյուրի համար, իսկ հիմա այդ տվյալները չեն հրապարակվում Փաշինյանի պոպուլիստական հայտարարությունների դաշտը չնեղացնելու համար»։