Դե դուրս արի ՀԱՊԿ-ից, կամ ինչո՞ւ չես չեղարկում հայ-ռուսական մեծ պայմանագիրը. Կարեն Բեքարյան

ՀԱՊԿ-ի հետ Հայաստանի աշխատանքները սառեցրած և ՀԱՊԿ-ում Հայաստանը ձայնի իրավունքից զրկելու խնդրի առաջ կանգնեցրած Նիկոլ Փաշինյանը դեկտեմբերի 13-ին աշխատանքային այցով գտնվում է Մոսկվայում՝ մասնակցելու իր նախագահությամբ տեղի ունեցող Եվրասիական միջկառավարական խորհրդի այս տարվա չորրորդ հերթական նիստին։ Այսօրվա նիստի օրակարգի հարցերով անդամ պետությունների ղեկավարները քննարկեցին ԵԱՏՄ ինտեգրման հետագա խորացման, էներգետիկայի, արդյունաբերության և էլեկտրոնային առևտրի զարգացման ոլորտներում համագործակցության ընդլայնման հարցեր։

168TV-ի «Ռեվյու» հաղորդաշարի եթերում, խոսելով ՀԱՊԿ-ը բոյկոտելու, բայց ԵԱՏՄ շրջանակում աշխատելու՝ ՀՀ իշխանության վարած քաղաքականության մասին, «Հայացք» վերլուծական կենտրոնի խորհրդի նախագահ, Արցախի ժողովրդի հիմնարար իրավունքների պաշտպանության հարցերով հանձնախմբի ներկայացուցիչ Կարեն Բեքարյանը նշեց.

«Հայաստանի այսօրվա իշխանությունները տանում են հետևյալ քաղաքականությունը՝ ՀԱՊԿ-ից ունեն դժգոհություններ, ՀԱՊԿ-ի հետ գործընթացը սառեցնում են, հայտարարում անդառնալիության կետն անցնելու մասին, բայց քանի որ ԵԱՏՄ-ում ունեն շահ, կա գերակայություն, այն է՝ տնտեսություն, շարունակում են աշխատել ողջ ծավալով։ Իրականության մեջ, սակայն, խնդիրը հետևյալն է. սա ոչ թե արտաքին քաղաքականություն է, այլ պատից պատ թռնելու քաղաքականություն՝ իշխանությունը պահելու նպատակով։ Իր այս քայլի նպատակը Ռուսաստանի հետ լարումը մեղմելն է, բայց դա չի նշանակում, որ մենք ականատես կլինենք նաև այդ քաղաքականության հետևողականության, որովհետև, եթե արևմտյան թևից մեկը բարձր գոռա, Փաշինյանը կանի ԵԱՏՄ-ի ուղղությամբ արվածը ջնջելու  քայլը»,- ասաց  Բեքարյանը։

Նրա համոզմամբ՝ Փաշինյանի վարած քաղաքականությունը բխում է իր իշխանության պահպանությանը սպառնացող վտանգները կառավարելուց, ինչն աշխատող մեխանիզմ է՝ իշխանությունը պահելու, կործանող՝ Հայաստանի հանրապետության համար։

«Ասում են՝ ի՞նչ ենք ավերել. իսկ ի՞նչ չեն ավերել. ո՞ւր է մեր անվտանգությունը, եթե այդ անվտանգությունը կա, ինչո՞վ է պայմանավորված, որ միակողմանի զիջումներով բավարարում են թուրք-ադրբեջանական օրակարգերը, եթե այդ անվտանգությունը չկա, ուրեմն իշխանություն չկա. կրկնում եմ՝ եթե կա՝ ինչո՞ւ են բավարարվում թուրք-ադրբեջանական պահանջները՝ հիթ-շքերթներով»,- ասաց Կարեն Բեքարյանը`ընդգծելով, որ, ի տարբերություն Հայաստանի իշխանության, ադրբեջանական  իշխանությունը շատ ակտիվ ամբողջ աշխարհին հրամցնում է Հայաստանից իր պահանջները, իբրև թե հիմնավորող թեզերը, որով կեղծ «Արևմտյան Ադրբեջան» թեզը բերել-հավասարեցրել է արցախցիների՝ Արցախ վերադարձի իրավունքի հետ։

Հարցազրույցի մանրամասները՝ տեսանյութում։