Ինչո՞ւ է Երևանի օդում փոշու պարունակությունն աճել. քաղաքապետարանը «լոլո»-ներ է ներկայացրել

Երևանում յուրաքանչյուր տարի ձմռան ամիսներին, օդերևութաբանական անբարենպաստ պայմաններով (օդերևութաբանական պայմաններ, որոնք նպաստում են վնասակար նյութերի կուտակմանը մթնոլորտի գետնամերձ շերտում)  պայմանավորված, դիտվում են օդում փոշու պարունակությունների աճ։ Նման պարզաբանում է տարածել Երևանի քաղաքապետարանը՝ արձագանքելով մայրաքաղաում օդի աղտոտվածության վերաբերյալ ահազանգերին ու մտահոգություններին։

«Դա ցույց են տալիս նաև 2022 թվականից Երևանի  քաղաքապետարանի կողմից տեղադրված օդի որակի դիտարկիչ սարքավորումները։ Այս ժամանակահատվածում մթնոլորտն աղտոտող հիմնական աղբյուրներին (շինարարություն, տրանսպորտ, բաց հանքերի շահագործում) ավելանում են ջեռուցման նպատակով վառելիքի տարբեր տեսակների այրումը, որը բերում է օրգանական փոշու, ծխի ավելացմանն օդում։ Հատկապես մասնավոր տների գերակշռությամբ թաղամասերում դա զգալիորեն մեծացնում է օդի աղտոտվածության մակրդակը, որովհետև բնական գազից բացի այրում են նաև վառելափայտ, տարատեսակ իրեր և թափոններ։ Հորդորում ենք քաղաքացիներին՝ զերծ մնալ  արտադրության, սպառման կամ տերևաթափից առաջացած թափոնները բնական միջավայրում կամ բնակավայրերում կամ դրանց շրջակայքում կամ դրանց այրման համար չնախատեսված այլ վայրերում կամ վառարաններում այրելուց, քանի որ դա առաջացնում է «Վարչական իրավախախտումների մասին» ՀՀ օրենքի 85․1 հոդվածով պատասխանատվության միջոցների կիրառում։

Երևանը գտնվում է գոգավորությունում և քաղաքի օդափոխությունն ապահովող գլխավոր գործոնը լեռնահովտային քամիներն են, որոնք ամեն երեկո փչում են Գեղամա լեռների լանջերից դեպի Արարատյան գոգավորություն՝ թարմ օդ բերելով քաղաք և ցրելով գոգավորությունում կուտակված օդը։ Սակայն այդ քամիները հոկտեմբեր ամսվա վերջերից դադարում են և մինչև մարտ չեն փչում, Երևանի օդափոխությունը խաթարվում է, և Արարատյան գոգավորությունում հաստատվում է ջերմային շրջադասություն։ Սառը օդը կուտակվում է տեղանքի ցածրադիր հատվածներում և երկար ժամանակ մնում։ Ըստ այդմ,  օդում փոշու մասնիկները սեղմվում, կուտակվում մթնոլորտի ստորին շերտերում և աղտոտվածության մակարդակը ավելանում է՝ մթնոլորտի գետնամերձ շերտում ձևավորվում է ֆոնային բարձր աղտոտվածություն։  

Հաշվի առնելով այս հանգամանքները և մայրաքաղաքում ձևավորված մթնոլորտային օդի ֆոնային բարձր աղտոտվածությունը` Երևանի քաղաքապետարանը մթնոլորտային օդի պահպանության բնագավառում լիազոր պետական մարմինների հետ քննարկում է ձմռան ամիսներին լրացուցիչ կանխարգելող միջոցառումներ անելու հնարավորությունը` աղտոտվածության մակարդակը նվազեցնելու նպատակով»,-նշում են քաղաքապետարանից։
Աղբյուր` Panorama.am
---
Այսպիսով, նման պարզաբանմամբ ավինյանական քաղաքապետարանը ուղղակիորեն ծաղրում է երևանցիներին՝ «լոլո»-ներ է կարդում օդում փոշու պարունակության մասին ու դա բացատրում... սեփական տները վառելափայտի այրմամբ տաքացնելով: Լավ, այդ հիմնարկում գոնե մեկը իրենց իսկ գրած անհեթեթությունը չի կարդացե՞լ: 
Երևանում օդը փոշու մեջ կորած է ու անշնչելի այն բացահայտ պատճառով, որ աջուձախ շինթույլտվություններ են տվել, շինարարություն է՝ անհրաժեշտ նորմերի խախտումներով: Հիմա, երբ առանց այդ էլ այս մեկուկես-երկու տարվա մեջ կտրուկ փրթված սաղարթախիտ ծառերն էլ տերևազրկվել են, փոշի չեն կլանում, աղտոտվածությունն ուղղակի մարդկանց աչքերն է լցվում, բառի ամենաուղիղ իմաստով: