Կիրանցի մասին Նիկոլ Փաշինյանի գրառումը և իրականությունը

Տավուշցի լրագրող Ոսկան Սարգսյանը ֆեյսբուքյան էջում անդրադարձել է Նիկոլ Փաշինյանի ֆեյսբուքյան գրառմանը՝ Կիրանցի մասին: Լրագրողը, նախ, մեջբերել է Փաշինյանի փչյոցները, մասնավորապես, «... Կիրանցում մենք ՀՀ սուվերեն տարածք չենք տվել, ...ես դա հաջողության պատմություն եմ համարում, շրջադարձային հաջողություն: Գնացեք Կիրանց եւ սեփական աչքերով կտեսնեք այդ հաջողությունը: Ինչ վերաբերվում է Կիրանցի մի քանի խնդրահարույց կադաստրային վկայականներին, մենք երկար զբաղվել ենք դրանց դե յուրե հիմքերի ուսումնասիրմամբ եւ ոչինչ չի գտնվել, ինչը մեզ հիմք է տվել ենթադրելու, որ դրանք տրվել են ապօրինի...  Եւ ի դեպ, Կիրանցում ոչ ոք ոչ ոքի չի ահաբեկել... (լավ է, չի գրել՝ սև ու կարմիր բերետների վայրենի հարձակումը՝ վկա- խմբ.): Մենք մարդկանց հետ ուղիղ, ազնիվ, առանց խորամանկությունների եւ շպարի խոսակցություն ենք ունեցել: Դրա մի մասն, ընդ որում, տեղի է ունեցել ուղիղ եթերում...»:
Այնուհետև Ոսկան Սարգսյանը ներկայացրել է իր դիտարկումները.

«Նիկոլ Փաշինյանի գրառումը իրականության հետ կապ չունի։ Հողերի հանձնումից հետո ես բազում անգամ եղել եմ Կիրանցում, և տեսել եմ, որ այնտեղ հաջողության պատմություն չէ, հողերի հանձնում, միակողմանի զիջում է։ Ահաբեկելու մասին։ Մի քանի օր առաջ Կիրանցի մի խումբ բնակիչների խնդրանքով ես շուրջ երկու ժամանոց հանդիպում ունեցա իրենց հետ, լսեցի գյուղի հողերի հանձնումից հետո ստեղծված իրավիճակի մասին նրանց մտահոգությունները։ Նրանց հարցրի՝ կարո՞ղ եմ գրել իրենց անունները, բոլորն ասացին՝ ոչ, նրանք չեն ցանկանում իշխանության հետ խնդիրներ ունենալ։ Կադաստրի վկայականների <<անօրինական>> լինելու մասին։ Կիրանցից Ադրբեջանին է հանձնվել 57 հողամաս,ԽՍՀՄ օրոք դրանք ինչպե՞ս կարող էին անօրինական տրվել։ Կիրանցի հարևան՝ Ոսկեպար գյուղում ԽՍՀՄ ժամանակից 3 առանձնատուն կադաստրի վկայական չունեն, ասում են, որ դրանք Ադրբեջանի տարածքում են կառուցվել։ ԽՍՀՄ օրոք և Հայաստանի անկախության տարիներին ինչո՞ւ այդ տների համար կադաստրի վկայականներ չտրվեցին, իսկ Կիրանցի 2 տան, 2 կառույցի և 53 հողամասի համար դրանք տրվեցին։

Սահմանազատման անվան տակ Կիրանցի հողերի հանձնումը, դրա դիմաց Կիրանցի բնակիչներին դրամական փոխհատուցումը կատարվել է կառավարության գաղտնի որոշմամբ, ինչը շատ բանի մասին է վկայում»։