Չներեցին, պատժեցին. Հակոբ Ասլանյանին հեռացրին «Քաղաքացիական պայմանագիր» կուսակցությունից կամ «թավիշի» փշերը

Հակոբ Ասլանյանը ,խմբակցության կարգերը խախտելու պատճառով, քիչ առաջ խմբակցության որոշմամբ հեռացվեց «Քաղաքացիական պայմանագիր» կուսակցությունից։  Այս մասին   ՔՊ-ի նիստից հետո լրագրողներին հայտնեց ՔՊ խմբակցության քարտուղար Արթուր Հովհաննիսյանը:

«Պայմանավորված է հայտնի հանգամանքներով․ Կար պարոն Աղազարյանը, որն արտահոսքեր էր կազմակերպում խմբակցությունից, ինչն ապացուցված է փաստերով։ Ցանկացած դրվագ, որտեղ որևէ մեկը , եթե կպաշտպանի այդ պրոցեսը, բնականաբար, պետք է արժանանար այս ճակատագրին։ Այս պահին խմբակցության նիստ էր և խմբակցության նիստով ենք կարող կուսակցությունից հեռացնել։ Կուսակցությունից կարող է հեռացնել վարչությունը, ինչի մասին վարչության անդամները լրացուցիչ կխոսեն։ Այս պահին պարոն Ասլանյանը հեռացվել է խմբակցությւոնից։ Նա այլևս չի հանդիսանում ՔՊ անդամ։ Մանդատի հարց քննարկել ենք։ Ասլանյանն այս պահին վերջնական որոշում չի հայտնել, նկատել ենք, որ չի ցանկանում վայր դնել մանդատը»,-ասաց Հովհաննիսյանը։

Ինքը՝ Հակոբ Ասլանյանը, նիստից հետո հեռացավ՝ որևէ մեկնաբանություն չտալով։
--
Մեր կողմից հիշեցնենք, որ Հակոբ Ասլանյանը մշտապես աչքի է ընկել իր ծայրահեղ ՔՊ-ական հայտարարություններով, Արցախի ու արցախցիների հասցեին անընդունելի արտահայտություններով: Այդ նրա բողոքի հետևանքով էր, որ ոստիկանները նախ, կալանավորել էին քաղաքացի Սեմվել Վարդանյանին, իսկ հետո, իրենց պաշտպանության տակ գտնվող կալանավորին գործնականում հանձնել էին իբր՝ «անհայտ» խոշտանգիչների հոշոտմանը: 

Աղբյուր` Panorama.am