Թուրքագետ. Տարածաշրջանում ապակայունացման ֆոնը օգտագործելով՝ Ադրբեջանը կարող է պատերազմ սանձազերծել Լեռնային Ղարաբաղում

Իրանում տեղի ունեցած ցանկացած խլրտուք իր ազդեցությունն է թողնում Հայաստանի անվտանգության վրա։ Այն բերում է հատկապես տարածաշրջանում կոնֆլիկտի սրման և նոր օջախների առաջացմանը։ Խոսքը նույնիսկ կարող է վերաբերել ղարաբաղյան կոնֆլիկտին, երբ տարածաշրջանում ապակայունացման ֆոնը օգտագործելով՝ Ադրբեջանը կարող է պատերազմ սանձազերծել Լեռնային Ղարաբաղում, այսօր հայտարարեց թուրքագետ, տարածաշրջանային փորձագետ Մուշեղ Խուդավերդյանը:

Իրանական Fars գործակալությունը դեկտեմբերի 29-ին հայտնել էր վեց քաղաքում զանգվածային ցույցերի մասին։ Ըստ իրանական լրատվամիջոցների՝ ցույցերն ուղղված են երկրի կառավարության վարած տնտեսական քաղաքականության դեմ։

Խուդավերդյանի կարծիքով Իրանում վերջին օրերին տեղի ունեցող լայնածավալ ցույցերը հեղափոխություն կատարելու և Իրանի վարչակազմը տապալելու նպատակ չեն հետապնդում: 

«Արևմուտքի նպատակը ոչ թե Իրան պետության ոչնչացումն է, այլ ընդամենն Իրանում այնպիսի իշխանություն հաստատելը, որը համահունչ կլինի արևմտյան շահերին և չի սպառնա Արևմուտքի ազգային անվտանգությանը: Իրանում ցույցեր հրահրելն ուներ նաև այլ նպատակ: Թերևս Ռուսաստանի ու Չինաստանի դաշնակից երկրներին թուլացնելով՝ հետագայում թուլացնել նաև այդ գերտերություններին»,- ասաց Մուշեղ Խուդավերդյանը՝ հավելելով, որ իր կարծիքով՝ իրանական ցույցերի կազմակերպմանը խառնված է ոչ միայն ԱՄՆ-ը, այլ նաև իսրայելական «Մոսսադը»»,- ասաց Խուդավերդյանը: 

Վերջին տվյալների համաձայն՝ ցույցերի հետևանքով զոհերի թիվը հասել է 20-ի:

Zham.am