«Տարակուսած եմ ՌԴ նախագահի մեկնաբանությամբ. Նիկոլը թող պատասխանի, ինչո՞ւ չի գնացել այդ քայլին». Հայկ Մամիջանյան

«Ես, կարծում եմ՝ ցանկացած հայ, տարակուսած եմ ՌԴ նախագահի մեկնաբանությամբ, որովհետև ակնհայտ էր, որ հարցը վերաբերում էր ոչ թե Արցախի Հանրապետության նկատմամբ իրականացված ագրեսիային, այլ ՀՀ ինքնիշխան տարածքի նկատմամբ»,- այս մասին ԱԺ խմբակցությունների ճեպազրույցների ժամանակ ասաց «Պատիվ ունեմ» խմբակցության ղեկավար Հայկ Մամիջանյանը՝ խոսելով ՌԴ նախագահ Վլադիմիր Պուտինի հայտարարության մասին, ըստ որի՝ «ՀՀ իշխանություններն այդպես էլ չճանաչեցին Արցախի անկախությունը, և, որ տարօրինակ կլիներ, եթե ՀԱՊԿ-ը գնար ու Արցախում կռվեր Հայաստանի կողմից»։

Հայկ Մամիջանյանն Արցախի անկախության ճանաչման հետ կապված երկու փաստարկ ներկայացրեց։

Նախ, առաջին պատճառը, ըստ որի՝ Արցախի անկախությունը նախկին իշխանությունները չեն ճանաչել՝ հնչեցվել է բազմիցս։

«Անկախության ճանաչում՝ ենթադրում է բանակցային գործընթացի ավարտ, հետևաբար՝ ակտիվ պատերազմական գործողությունների վերսկսում։ Կարծում եմ՝ ակնհայտ է, թե ինչու այդ ամենը տեղի չի ունեցել։

Կա երկրորդ դրվագը, և շատ ուրախ եմ, որ այս առիթը եղավ, որ դրա մասին խոսեմ, քանի որ քիչ է խոսվում։ 2008 թվականին ՄԱԿ-ի Ասամբլեայում ընդունվել է կեղծ, բացարձակ իրականությանը չհամապատասխանող, հակահայկական, պրոադրբեջանական մի բանաձև։ Կարծում եմ՝ դրա ընդունման պատճառները բոլորի համար ակնհայտ են՝ ՄԱԿ-ում յուրաքանչյուր պետություն ունի մեկ ձայն, այնտեղ գոյություն ունի իսլամական եղբայրություն, լոբբինգն ավելի հեշտ է, և այլն։ Սա էր պատճառը, որ Հայաստանը չէր ցանկանում, որպեսզի Մինսկի խմբից զատ՝ այլ հարթակում լինեին բանակցությունները։

Դրանից հետո, երբ համանախագահ երկրների ղեկավարները՝ ամենաբարձր մակարդակում, Հայաստանին հորդորում էին որևէ դեպքում չճանաչել Արցախի անկախությունը, որպեսզի չտորպեդահարվի բանակցային գործընթացը, ՀՀ-ն երկրորդ պայմանն առաջ քաշեց՝ եթե ևս մեկ անգամ ՄԱԿ-ում ընդունվի կեղծ պրոադրբեջանական բանաձև, ապա դա հանդիսանալու է պատճառ, որպեսզի Հայաստանը ճանաչի Արցախի անկախությունը»,- շեշտեց Հայկ Մամիջանյանը։

Նա նաև ասաց, որ հայկական կողմից առաջ քաշված այս պայմանից հետո ՄԱԿ-ում նման բանաձև երբեք չի ընդունվել՝ պայմանն աշխատել է։

«Առաջին պայմանի իրական ապացույցը տրվել է 2016 թվականի ապրիլյան պատերազմի ժամանակ, երբ ԵԱՀԿ անդամ երկրների դեսպանների հետ նախագահականում հանդիպման ժամանակ նախագահ Սերժ Սարգսյանը հստակ զգուշացրել էր, որ եթե ռազմական գործողությունները շարունակվեն 7 օր, ապա Հայաստանը ճանաչելու է Արցախի անկախությունը։

Պատերազմական գործողությունները դադարեցվեցին Ադրբեջանի խնդրանքով՝ 4-րդ օրը։ Բայց ես ավելի շատ տարակուսած էի, թե 2020 թվականին Նիկոլ Վովայի Փաշինյանն ինչո՞ւ չճանաչեց Արցախի անկախությունը, երբ պատերազմ էր ու խուսափելու բան չկար, ինչից խուսափում էր՝ արդեն իրականություն էր։ Լավ կլինի՝ ինքը պատասխանի, թե ինչու այդ քայլին չի գնացել»,- եզրափակեց Հայկ Մամիջանյանը։

Մանրամասները՝ 168.am-ի տեսանյութում