Երևանում հանրային տրանսպորտից ամեն օր 25-30 միլիոն դրամ է գրպանվում. Մանուկ Սուքիասյան (տեսանյութ)

2025 թվականի հունվարի 1-ից Երևանում հասարակական տրանսպորտի ուղեվարձը շեշտակի կթանկանա։

Այս և առանցքային այլ հարցերի վերաբերյալ Oragir.News-ի «Օրակարգ» հաղորդաշարի տաղավարում զրուցել են «Մայր Հայաստան» խմբակցության ղեկավար Մանուկ Սուքիասյանի հետ։

Ընդդիմադիր խմբակցության ղեկավարը համոզմունք հայտնեց, որ հանրային տրանսպորտի ուղեվարձը թանկացնելու փոխարեն քաղաքային իշխանությունները նախևառաջ պետք է այդ ոլորտում առկա հսկայական ստվերային շրջանառությունը կրճատեին, ինչից հետո ուղեվարձը թանկացնելու կարիք առհասարակ չէր լինի․

«Օրական ուղևորափոխադրումները, իրենք էլ թվերի մեջ խճճվում են, բայց մոտավորապես կազմում է 600 հազար։ 600 հազար մարդու համար եթե դու ափսոսում ես այդքան դոտացիա տալ, նշանակում է, որ դու քո տեղում չես։ Դու ուզում ես ընդամենը այդ փողերը տնտեսես, որ քո հայեցողությամբ տենդերներ անես, որ քո հետ կապակցված ՍՊԸ-ները գան, այդ տենդերները շահեն, փող աշխատեն, շրջագայությունների վրա ծախսես, զանազան համերգներ հովանավորես, չգիտեմ՝ պարգևավճարներ բաժանես։

Այսինքն՝ խնայենք երևանցու վրա, կրճատենք, որ մեր խնայած ռեսուրսներն ազատորեն տնօրինենք, շրջագայենք, մեր մոտիկները փող աշխատեն։ Էտ տրամաբանության մեջ ակնհայտ է, որ Երևանի քաղաքային իշխանություններն այդտեղ ուղղակի անելիք չունեն։ Հիմա էլի եմ ուզում կրկնեմ՝ ստվերի կրճատման պարագայում դոտացիայի կարիք չի լինի, կամ եթե լինի էլ՝ այն շատ ողջամիտ կլինի։ Տեսեք իրենք տարբեր թվեր են հրապարակում, բայց մեր թվերը ցույց են տալիս, որ ամեն օր 25-30 մլն դրամ ինչ-որ մարիկ գրպանում են»։

Մանուկ Սուքիասյանը հայտնեց նաև, որ այս պահի դրությամբ իրենց հաջողվել է ավելի քան 12 հազար ստորագրություն հավաքել, և գործընթացը հաջողությամբ շարունակվում է։

Առավել մանրամասն՝ տեսանյութում։