Արայիկ Խանդոյանը պահվում է անմարդկային պայմաններում․ փաստաբան

Անցած ուրբաթ երեկոյան 10 օրով պատժախուց տեղափոխվելուց հետո հացադուլ հայտարարած «Սասնա ծռեր» զինված խմբի անդամ Արայիկ Խանդոյանը պահվում է անմարդկային պայմաններում, «Ազատությանը» փոխանցեց նրա փաստաբանը։ Արայիկ Պապիկյանը անցած շաբաթ օրն է տեսակցել պաշտպանյալին։

«Ամենաարտառոցը այն է, որ նրան մի խուց են տեղափոխել, որը զուրկ է եղել ամենանվազագույն պայմաններից: Հացադուլ է հայտարարել անձը, գտնվում է պատժախցում, որը չի ունեցել ապակի, խցի ներսում ջերմաստիճանը եղել է զրոյից ցածր», ֊ պատմեց փաստաբանը:

Արայիկ Պապիկյանն ասաց, որ զինված խմբի անդամը ծայրահեղ այս քայլով իր բողոքն է արտահայտում իշխանությունների հետապնդումների դեմ, ինչպես նաև զորակցում է հացադուլի մեջ գտնվող «Սասնա ծռերի» անդամներ Սմբատ Բարսեղյանին և Արմեն Բիլյանին։ Բարսեղյանն արդեն 10, իսկ Բիլյանը 15 օր է հրաժարվել են սննդից՝ պահանջելով իրենց Նուբարաշենի բանտից տեղափոխել համեմատաբար լավ պայմաններ ունեցող «Արմավիր» քրեակատարողական հիմնարկ։

Արդարադատության նախարարության քրեակատարողական վարչությունից «Ազատությանը» փոխանցեցին, որ արգելված իր պահելու համար պատժախուց տեղափոխված Խանդոյանն ամենևին էլ անմարդկային պայմաններում չի պահվում։ Խոսնակ Գոռ Ղլեչյանն ասաց, որ դեռ պատժախուց տեղափոխելուց առաջ են խցի ապակին փոխել։

Մանրամասները՝ Azatutyun.am-ում: