ՔՊ-ական պատգամավորները Արա Շիրինյանին առաջարկում են փակել «Շողակաթ» հեռուստաալիքը, հաջորդիվ՝ փակել կտան Մայր Աթո՞ռը
«Տեղ տալ մի կրոնական կազմակերպության, որն ամենևին բոլոր քաղաքացիներին չի ներկայացնում ու Հայաստանի բազմազանությունը չի ներկայացնում, խտրականացնում է փոքրամասնություններին, որոնց հետ կապված մենք խնդիր ունենք։ «Շողակաթը» միտինգներ է լուսաբանում ու Հայ դատի գրասենյակի հայտարարություններն է տարածում` Սրբազան պայքարին աջակցող։ Ու սա եղավ մշակութային ալի՞ք»,-ԱԺ-ում բյուջեի քննարկման ժամանակ Հանրային հեռարձակողի խորհրդի նախագահ Արա Շիրինյանին դիմեց ՔՊ պատգամավոր Թագուհի Ղազարյանը` ակնարկելով Հայ առաքելական եկեղեցուն։
Մինչ այդ ֆինանսավարկային և բյուջետային հարցերի մշտական հանձնաժողովի նախագահ Ծովինար Վարդանյանը հայտարարեց, որ Հանրային ռադիոյի բովանդակությունն իր համար անհետաքրքիր է, ինչպես նաև «Շողակաթ» հեռուստաալիքին, որը պետք է հոգևոր-մշակութային հաղորդումներ հեռարձակի, սակայն միատարր հեռուստաընկերություն է, որ ներկայացնում է միայն Հայ առաքելական եկեղեցուն։
ՔՊ-ակն պատգամավորը առաջարկեց «Շողակաթը» փակել ու գումարներն ուղղել Հանրային ռադիոյի արդիականացմանը։
Արա Շիրինյանը նախ հիշեցրեց, որ հանրային ռադիոյի բյուջեի ֆինանսավորմամբ 4 անսամբլ է իր գործունեությունն իրականացնում` հնագույն երաժշտության, «Սայաթ-Նովա» ժողգործիքների` Թովմաս Պողոսյանի և Ռուբեն Մաթևոսյանի ղեկավարությամբ, սիմֆոնիկ-էստրադային` Երվանդ Երզնկյանի գլխավորությամբ, «Արևիկ» մանկական անսամբլ Վահե Հայրապետյանի ղեկավարությամբ։
Նա նաև հայտարարեց, որ «Շողակաթի» եթերում քաղաքական ռեպորտաժ չի տեսել և շեշտեց, որ այդ ալիքը բացառապես մշակութային է, ոչ թե կրոնական։
Անդրադառնալով Վարդանյանի առաջարկին՝ Շիրինյանն այդ մոտեցումը որակեց որպես «պանիկայի մեջ ինչ-որ գործողություններ»։
«Ես չեմ կարծում, որ Հանրային ռադիոն և «Շողակաթն» աշխատում են անարդյունավետ. նրանք աշխատում են իրենց կարողությունների չափով, երբեմն` ավելին։ Եթե մշակութային հեռուստաալիք չլինի, ապա մեր հասարակությունը կդառնա քաղաքական կուսակցությունների հասարակություն»,-արձագանքեց Շիրինյանը։
ՔՊ-ական Սիսակ Գաբրիելյանն էլ հակադարձեց. «Եկեղեցական ո՞ր Կտակարանում է` Հի՞ն, թե՞ Նոր, որտե՞ղ է ասված, թե ցույցերը մշակութային միջոցառումներ են.... Ու ռեպորտաժ են անում, որ սահմանազատման գործընթացը դավաճանական է»։
Հետևեք մեզ Facebook-ում