Այդ փաստաթուղթն ավելի լուրջ և ծանր պրոցեսի նախերգանքն է. Կարեն Բեքարյան

67 կողմ, 0 դեմ, 0 ձեռնպահ ձայների հարաբերակցությամբ և բացառապես Ազգային ժողովի «Քաղաքացիական պայմանագիր» խմբակցության կողմից վավերացված հայ-ադրբեջանական սահմանազատման վերաբերյալ կանոնակարգը լրջագույն խնդիրներ ունեցող փաստաթուղթ է, որը ներպետական ընթացակարգերով անցկացնելու նպատակը, պատասխանատվության խնդիրը փոխվարչապետ Մհեր Գրիգորյանի, Սահմանադրական դատարանի, Ազգային ժողովի «Քաղաքացիական պայմանագիր» խմբակցության, ինչպես նաև այդ նույն խմբակցությանը ձայն տված մարդկանց վրա տարրալուծելն է։

Այս փաստաթուղթն ավելի լուրջ և ծանր պրոցեսի նախերգանքն է, որի անունը ՀՀ այս իշխանությունը կդնի «Խաղաղության պայմանագիր»։

168TV-ի «Ռեվյու» հաղորդաշարի եթերում, խոսելով Ազգային ժողովով վավերացված կանոնակարգի և դրանից բխող վտանգների մասին, նման տեսակետ հայտնեց «Հայացք» վերլուծական կենտրոնի Խորհրդի նախագահ, Արցախ ժողովրդի հիմնարար իրավունքների պաշտպանության հարցերով հանձնախմբի անդամ Կարեն Բեքարյանը։

«Այս փաստաթուղթն իր մեջ ներառում է ինքնախոստովանական ցուցմունք առ այն, որ այն, ինչ տեղի ունեցավ Տավուշում, իրականում կապ չունի սահմանազատման և սահմանագծման հետ։ Այս կանոնակարգում շատ հստակ երևում է, որ գործընթացն իրականացվելու է փուլերով, ամեն փուլում արվածը համարվելու է արդեն սահմանագծված և սահմանազատված, իսկ դա նշանակում է, որ Ադրբեջանը թելադրելու է, թե ի՞նչ է ուզում, ո՞ր տարածքում, դա ստանալու է, և համարվելու է, թե գործ ունենք սահմանազատված և սահմանագծված կիլոմետրերի հետ։
Արդյունքում՝ բոլոր այն տեղերում, որտեղ կարող է նպաստավոր դիրքեր ստանալ Հայաստանից, Ադրբեջանը ստանալու է, իսկ եթե իրենից է կախված լինելու որևէ քայլ, օրինակ, զորքի հետքաշում Հայաստանի սուվերեն տարածքից, գործընթացը կախելու է օդում»,- ասաց Կարեն Բեքարյանը։