Զինված մի քանի մարտիկ Անկարայում հարձակվել են անօդաչուներ արտադրող Tusaş-ի գլխամասային գրասենյակի վրա

Այսօր ցերեկը, մի քանի զինված մարտիկներ, որոնց թուրքական քարոզչամիջոցները նշում են որպես ահաբեկիչներ, հարձակվել են մայրաքաղաք Անկարայի կենտրոնից մոտ 40 կմ հեռավորության վրա գտնվող «Թուրքական աերոտիեզերական կորպորացիայի»՝ Tusaş-ի գլխավոր գրասենյակի վրա: 
Ինչպես հաղորդում են միջազգային լրատվամիջոցները, հարձակվողները, ենթադրաբար երեքն են եղել՝ զինված ինքնաձիգներով, ատրճանակներով ու նռնակներով: Նրանք «դեպքի վայր» են ժամանել տաքսիով: Կադրերում երևում է, թե ինչպես են առնվազն երկու հոգի իջնում մեքենայից ու գրեթե անմիջապես կրակ բացում շրջակայքում գտնվողների ուղղությամբ, թուրքերը փախչում են, բայց մի քանիսը, ըստ երևույթին՝ խոցված, տապալվում են գետնին: 
Ըստ լուրերի, հարձակվողները կրակելով ներթափանցել են թուրքական խոշոր ընկերության գլխամասային գրասենյակի տարածք: Թե դրսում, թե ներսից լսվել են պայթյունի ձայներ: Որոշ ժամանակ անց տարածքը շրջափակվել է թուրքական ուժայինների կողմից, հստակ տեղեկություններ դեռ չկան, բայց հաղորդվում է, որ հարձակվողներից երկուսը սպանվել են, մյուս կողմից, հաղորդվում է, որ կան զոհեր ու գրեթե երկու տասնյակ վիրավորներ, պատանդներ: 

Նկատենք, որ հիշյալ կորպորացիան զբաղվում է ռազմական ինքնաթիռների, անօդաչու թռչող սարքերի արտադրությամբ, այդ թվում՝ ամերիկյան F-16-երի արդիականացմամբ: Ըստ էության, 3 հոգի հարձակվել էր Թուրքիայի կողմից հայության դեմ կիրառվող ռազմատեխնիկա արտադրող ընկերության վրա: 
Zham.am