«Պատիվ ունեմ» խմբակցությունը չի մասնակցում Հայաստանի և Ադրբեջանի սահմանազատման հանձնաժողովների կանոնակարգի քննարկմանը

«Պատիվ ունեմ» խմբակցության ղեկավար Հայկ Մամիջանյանը հայտարարեց, որ իրենք չեն մասնակցելու Ազգային ժողովի օրակարգում ընդգրկված «Հայաստանի Հանրապետության և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողովի ու Ադրբեջանի Հանրապետության և Հայաստանի Հանրապետության միջև պետական սահմանի սահմանազատման պետական հանձնաժողովի համատեղ գործունեության մասին» կանոնակարգ քննարկմանն ու քվեարկությանը։

«Հաշվի  առնելով այն փաստը, որ նմանօրինակ կանոնակարգները չեն ենթադրում վավերացման այն ընթացակարգը, որով իրեն անց են կացնում Հայաստանի կառավարիչները, այն փաստը, որ ՍԴ-ն  որոշման մեջ հարցին բացարձակ չվերաբերող մեկնաբանությամբ ներառում է ներկայացրել, հիմնավոր կասկած է  առաջանում, որ սույն  գործողությունները միտված են հերթական հակապետական զիջումների՝  հետագայում արդարացում ծառայելուն։ Հենց այդ  և մի շարք այլ պատճառներով «Պատիվ ունեմ» խմբակցությունը չի մասնացել ու չի մասնակցելու կանոնակարգի  քննարկմանն ու  քվեարկությանը։ Դիրքորոշման ավելի ծավալուն ներկայացումը կլինի այսօր ՀՀԿ գործադիր մարմնի տարածած հայտարարությունով»,- ասաց Հայկ Մամիջանյանը։

Այնուհետև ամբիոնին մոտեցեվ փոխվարչապետ Մհեր Գրիգորյանը՝ ներկայացնելու կանոնակարգը։ Այդ ընթացքում ընդդիմադիր «Հայաստան» և «Պատիվ ունեմ» խմբակցությունների պատգամավորները լքեցին նիստերի դահլիճը։

Հիշեցնենք՝ «Հայաստան» խմբակցությունը հայտարարել էր, որ չի մասնակցելու  հակասահմաադրական, հակաօրինական  կանոնակարգի քննարկմանն ու քվեարկությանը։ 
Աղբյուր` Panorama.am