«Ուրախ» ավտոբուս

Խոսքն ամենևին էլ Ալբերտ Մկրտչյանի ֆիլմի մասին չէ։ Այնտեղ ուրախ բառն առանց չակերտների էր և թեման լրիվ այլ էր։ Այս դեպքում ամեն ինչ տխուր է, իսկ թեման՝ թալանչիական։

Ինչպես հայտնի է, Երևանում «Քաղաքացիական պայմանագիր» կուսակցությունն՝ իրեն կցված քույր կուսակցության և անասնագողության արդյունքում քաղաքային իշխանության տիրույթում հայտնվածների օգնությամբ թանկացրել է քաղաքային տրանսպորտի գինը մինչև 3 անգամ՝ հասցնելով մինչև 300 դրամի (եթե քաղաքացին օրվա մեծ մեկ անգամ օգտվի տրանսպորտից)։

Սրանք հիմնավորում են, թե, իբր, ավտոբուսի գները չթանկացնելու տարբերակ չունեն, քանի որ վնասով են աշխատում։ Բայց իրականությունը լրիվ այլ է։

«Մայր Հայաստան»–ի ներկայացուցիչները և՛ ավագանու նիստերի ժամանակ, և՛ այլ հարթակներով բացահայտել են այն թալանը, որն առկա է քաղաքային տրանսպորտի ոլորտում։

Ճարպիկ և լեզվանի փոխքաղաքապետ Սուրեն Գրիգորյանը պնդում է, որ իրենք հաշվարկներն անում են՝ ելնելով օրական 550․000 ուղևորի կանխավարկածից, քանզի չափումները դա են ցույց տվել: Դա նշանակում է, որ օրական պետք է «Երևան ավտոբուս» ՓԲԸ մուտքերը կազմեն 55 միլիոն դրամ, քանզի մեկ ուղևորափոխադրման գինը 100 դրամ։ Սակայն քաղաքապետարանի մեկ այլ պաշտոնյան՝ մամլո խոսնակը, գոհունակությամբ նշում է, որ վերջին 4 ամսում իրենք լավացրել են փող հավաքելու գործընթացը և ուղևորափոխադրումներից մուտք է եղել 2 միլիարդ 817 միլիոն դրամ։ Այսինքն՝ օրական միջինը կազմում է 23 միլիոն դրամի չափ։ Դա էլ իր հերթին նշանակում է, որ օրական ստվերը կազմում է մոտ 32 միլիոն դրամ, քանզի օրը 23 միլիոն դրամը նշանակում է օրը 230.000 ուղևորափոխադրում։ Իսկ ինչպես վերևում հիշեցրեցինք, մեզ ասում էին, որ հաշվարկներն իրականացվում են օրական 550.000 ուղևորի տարբերակով։

Օրական շուրջ 80.000 դոլարի չափ ստվերը կամ ժողովրդական լեզվով ասած՝ թալանը, ցույց է տալիս, որ քաղաքային տրանսպորտը կարող է չթանկանալ, ինչն էլ պնդում է «Մայր Հայաստանը»՝ առաջարկելով նաև փաթեթային գնումների դեպքում 100 դրամից էլ պակաս գին։ Բայց դե քաղաքային իշխանության թալանի ախորժակն այնպիսին է, որ չեն ուզում զիջումների գնալ ու որոշել են Նոր տարվա նվեր անել քաղաքացիներին։ Վերջիններս էլ իրենց հերթին պետք է հակառակ նվերն անեն «Գազելի» ֆոնին էժանագին փիառ անող Տիգրան Ավինյանին՝ ստիպելով հրաժարական տալ ու գնալ արտահերթ ընտրությունների։

Հայկ Ուսունց
7or.am