Նայեք, թե ինչքա՜ն ուրախ է Փաշինյանը՝ Էրդողանի հետ հանդիպելիս

Նյու Յորքում կատարվել է Փաշինյանի երազանքը: Նա, որպես Հայաստանի ներկայացուցիչ, ավելին, որպես՝ ՀՀ վարչապետի պաշտոնն զբաղեցնող, հանդիպել է իր սիրելի Թուրքիայի նախագահ Ռեջեփ Էրդողանին: 
Այդ մասին պաշտոնական կայքում հրապարակվել է հետևյալ հաղորդագրությունը.
«ՄԱԿ-ի Գլխավոր վեհաժողովի 79-րդ նստաշրջանի շրջանակում տեղի է ունեցել  Նիկոլ Փաշինյանի և Թուրքիայի նախագահ Ռեջեփ Թայիփ Էրդողանի հանդիպումը:
Զրուցակիցները մանրամասն անդրադարձ են կատարել Հայաստան-Թուրքիա հարաբերությունների կարգավորման գործընթացի շրջանակներում արդեն իսկ կատարված քայլերին և առկա պայմանավորվածություններին:
Ընդգծվել է կարգավորման գործընթացն առանց նախապայմանների շարունակելու և հարաբերություններին նոր ազդակ հաղորդելու պատրաստակամությունը: Կողմերը անդրադարձ են կատարել նաև տարածաշրջանային հարցերին:
Փաշինյանը նախագահ Էրդողանին տեղեկացրել է Հայաստան-Ադրբեջան կարգավորման գործընթացի առկա իրավիճակի, հարաբերությունների կարգավորման պայմանագրի ստորագրման պատրաստակամության, ինչպես նաև ՀՀ կառավարության «Խաղաղության խաչմերուկ» նախաձեռնության մասին»:
Հատուկ ուշադրություն դարձրեք տարածված լուսանկարներին ու այդ՝ արձանագրված դրվագներում Նիկոլ Փաշինյանի հոգեվիճակն արտացոլող տրամադրությանը: Փաշինյանը, Էրդողանի հետ հանդիպման ընթացքում, կարելի է ասել՝ հրճվանք և երջանկություն է ճառագում, իսկապես, անկեղծորեն ուրախ է: Իսկ հիմա մտովի հիշեք Փաշինյանի դեմքի արտահայտությունները, երբ նրան հիշեցնում են Արցախի մասին, կամ եթե լավ հիշողություն ունեք, վերհիշեք նրա դեմքին արտացոլվող ատելությունն ու չարությունը, երբ խոսում է Արցախի հայերի, առհասարակ, հայկական խնդիրների մասին, երբ նրան այդ խնդիրները հիշեցնող հարցեր են ուղղում: 
Շատ խոսուն պատկերներ են: Չափազանց ակնհայտ, որպեսզի չտեսնելու տրվեն: 

Առանձնահատուկ պետք է ընդգծել հաղորդագրության այս արտահայտությունը. «Զրուցակիցները մանրամասն անդրադարձ են կատարել Հայաստան-Թուրքիա հարաբերությունների կարգավորման գործընթացի շրջանակներում արդեն իսկ կատարված քայլերին և առկա պայմանավորվածություններին»:
Դե, իսկ հիմա ինքներդ ձեզ հարց տվեք. ձեզ ի՞նչ է հայտնի Նիկոլ Փաշինյանի ու ցեղասպանական ոճրագործ, հայատյաց ու մեր ազգի երդվյալ թշնամի Թուրքիայի, Էրդողանի միջև առկա պայմանավորվածությունների մասին: 
Բոլորս, իհարկե, տեսնում ենք այդ պայմանավորվածությունները, անգամ կարելի է ասել՝ ապրում ենք այդ պայմանավորվածությունների հետևանքների պայմաններում, բայց ձեզ, որպես «հերոս հարկատուների», որպես Փաշինյանի կառավարության ֆիզիկական գոյությունն ապահովող-ֆինանսավորողների, որևէ բան հայտնի՞ է այդ «պայմանավորվածությունների» մասին: 

Zham.am