ՔՊ-ի մոտ ոչինչ չի ստացվում․ Երևանում տրանսպորտի թանկացումը կարող է կրկին հետաձգվել

Չնայած հանրության լայն շերտերի դժգոհությանը, մայրաքաղաքի իշխանություններն այդպես էլ չհրաժարվեցին հանրային տրանսպորտի սակագինը թանկացնելու որոշումից, և 2025 թվականի հունվարի 1-ից այն կմտնի ուժի մեջ։ Սրան զուգահեռ՝ միասնական տոմսային համակարգը, որն արդեն մասամբ ներդրվել է, հանրության շրջանում լայն տարածում չի գտնում, ինչի մասին այսօր կայացած գործակարգավարական նիստի ժամանակ խոստովանեց նաև Տիգրան Ավինյանը՝ նշելով, որ հունվարի 1-ից ամբողջապես նոր տոմսային համակարգի անցնելն այսօրվա թվերով շատ վտանգավոր է։

Ավինյանը նաև չբացառեց, որ մետրոպոլիտենի օրինակով ավտոբուսներում և տրոլեյբուսներում կարող են սահմանափակումներ կիրառվել․ «Իրականում Մետրոպոլիտենի փորձը ցույց է տալիս, որ որոշակի սահմանափակումներ միջանկյալ պետք է մտնեն նաև ավտոբուսում և տրոլեյբուսում, որովհետև մեկ տոկոս կամ մեկ տոկոսից ցածր թվերը մեզ բացարձակապես չեն բավարարում, եթե հունվարի 1-ից մենք անցնում ենք ամբողջությամբ նոր համակարգի»։

Oragir.News-ը Երևանի ավագանու ընդդիմադիր «Մայր Հայաստան» խմբակցության ղեկավար Մանուկ Սուքիասյանից հետաքրքրվեց՝ Տիգրան Ավինյանի այս հայտարարությունը վկայո՞ւմ է այն մասին, որ քաղաքային իշխանությունները մտադիր են հրաժարվել տրանսպորտի թանկացումից կամ կրկին հետաձգել այն, ինչին ի պատասխան՝ նա նշեց, որ ինչպես քաղաքային, այնպես էլ համապետական իշխանությունների ասածներից ոչ մեկն իրականություն չի դարձել, և այս մեկը նույնպես բացառություն չէ։ Նա շեշտում է, որ Երևանի քաղաքապետարանը զբաղված է ընդամենը շինթույլտվություններ բաժանելով և համերգներ կազմակերպելով․

«Երևանը գտնվում է կառավարման խայտառակ ճգնաժամում, ոչ մի զարմանալու բան չկա, լրիվ օրինաչափ է։ Շատ հավանական է, որ հիմիկվանից ֆոն են ստեղծում, որպեսզի հունվարի 1-ից տրանսպորտի սակագնի թանկացումն ինչ-որ պատճառաբանություններով կրկին հետաձգեն։ Այնպես որ՝ զարմանալու ոչինչ չկա, նույն չակերտավոր տրամաբանությունն է գործում․ ինչ ստանձնում են, իրենց մոտ չի ստացվում»։

Oragir.News-ի հարցին, թե ինչո՞վ է պայմանավորված, որ հանրությունն առանձնապես հետաքրքրված չէ միասնական տոմսային համակարգով և չի ցանկանում դրանից օգտվել՝ Մանուկ Սուքիասյանը պատասխանեց՝ վերահաստատելով, որ այս իշխանությունների մոտ ոչինչ չի ստացվում։ «Դա էլ է չէ որոշակի տեղեկատվական արշավ ենթադրում, հիմիկվանից պիտի հոլովակները պտտվեին՝ ինչ տարբերակներով են լինելու վճարումները, որտեղից կարող են մարդիկ ձեռք բերել, անընդհատ պետք է հանրային իրազեկում գնար և այլն։ Օրինակ՝ ծառերի էտի արդյունքում առաջացող փայտն իրենք պատրաստ են տալ սոցիալապես անապահով ընտանիքներին՝ որպես ձմեռվա վառելիք, բայց քանի՞ հոգի են տեղյակ այդ մասին․ չնչին թվով մարդիկ։ Ընդհանրապես՝ իրենց մոտ ոչինչ չի ստացվում, իրենք ոչինչ չեն կարողանում անել, ինչ ստանձնել են չեն կարողացել»,- նշում է նա։

Մանուկ Սուքիասյանն ուշադրություն է հրավիրում այն բանին, որ Երևանը 125 միլիարդ դրամանոց քաղաքային բյուջե ունի, սակայն քաղաքային իշխանությունները կրկին գնում և իրենց ձեռքն առաջ պարզած կառավարությունից 2․5 միլիարդ դրամ են խնդրում, որպեսզի ասֆալտ անեն։ Նա նշեց նաև, որ նախորդ տարվա համեմատ աղբահանությանը հատկացվող գումարը 1․7 միլիարդ դրամով կրճատվել է, ինչի պատճառով էլ Երևանի փողոցներում աղբը վխտում է։

«Այստեղ հարց է առաջանում․ 125 միլիարդանոց բյուջեն դուք ինչի՞ վրա եք ծախսում, որ ասֆալտի փող չունեք, աղբահանության բյուջեն կրճատում եք, ասում եք՝ վարորդ չկա, տրանսպորտին պատրաստ չեն դոտացիա տալ։ Այդ 125 միլիարդանոց բյուջեն ինչի՞ վրա է ծախսվում, ջրահեռացումն ասում են՝ Վեոլիա ջրինն է, մենք լավություն ենք անում կողքից ու մի թեթև կոյուղատար ենք կառուցում։ Այսինքն՝ այս մարդկանց բանուգործը շինթույլտվություններ բաժանելն է ու երեկոյան գնալ ինչ-որ համերգներ ու բալետներ նայելն է»,- նշում է նա։

Oragir.News-ի հարցին՝ եթե հունվարի 1-ից տրանսպորտի գնի թանկացման որոշումն այնուամենայնիվ ուժի մեջ մտնի, ապա «Մայր Հայաստան»-ը մտադի՞ր է դրա դեմ փողոցային պայքար սկսել՝ ընդդիմադիր խմբակցության ղեկավարը պատասխանեց, որ փողոցային պայքարն առկա է իրենց գործիքակազմի մեջ։ «Մեր գործիքակազմի մեջ փողոցային ակցիաները միշտ եղել են, միշտ կան և միշտ էլ լինելու են, ու ես ամեն ինչ շատ հնարավոր եմ համարում»,- եզրափակեց նա։

Հրապարակման հղումը՝
© ORAGIR.NEWS https://oragir.news/hy/material/2024/09/23/130408?fbclid=IwY2xjawFfM6RleHRuA2FlbQIxMQABHSC107BS2ysOZ8Ni6njrnkkVd_Jvz0GZOobM2wVosF3SS1deDj9YsAMlKA_aem_fSJdcgvdhOWtzR_jcPfObQ