Արման Սահակյանը գնել է Գուրգեն Արսենյանի բիզնեսը

«Հրապարակ» թերթը գրում է.

«Մենք գրել էինք, որ ԱԺ պատգամավոր Արման Սահակյանը մտադիր է վաճառել իրեն պատկանող «Կրպակ» խանութների ցանցը, գնորդն էլ պիտի լինի Սամվել Ալեքսանյանը, որը դրանք հետո «Երեւան սիթի» է դարձնելու։ Գործարքից դեռ նորություն չկա, բայց գործընթացը գնում է, հավանաբար՝ վաճառքը կկայանա հունվարից հետո։ Բայց Արման Սահակյանը մի կողմից վաճառում է իր բիզնեսները, մյուս կողմից՝ նոր բիզնեսներ գնում։

Մեր տեղեկություններով՝ նա վերջերս գնել է նախկին պատգամավոր Գուրգեն Արսենյանին պատկանող «Ունիքորն» ընկերությունը, որը Հայաստանում ծխախոտ ներմուծող խոշորագույն ընկերություններից է։ Նաեւ ծխախոտ ներմուծող եւս մեկ ընկերություն է ձեռք բերել՝ ըստ էության դառնալով շուկայում առաջատարը։ Արման Սահակյանը մեր այս տեղեկություններին ի պատասխան միայն մեկ բան ասաց․ «Նո քոմենթ», ըստ էության՝ չհերքելով մեր տեղեկությունները։

Հիշեցնենք, որ Արման Սահակյանին է պատկանում նաեւ «Սովրանո» ընկերությունը, որը եւս խմիչքներ ու այլ ապրանքատեսակ ներմուծող խոշոր ընկերություն է։

Իսկ Գուրգեն Արսենյանը, պատգամավոր չդառնալուց հետո, ըստ տեղեկությունների, Հայաստանում վաճառել է իր բոլոր բիզնեսները՝ թողնելով միայն դրսի բիզնեսը։ Ասում են՝ նա այժմ զբաղված է ճամփորդելով, աշխարհ ման գալով, մտադիր է նոր հորիզոններ նվաճել, նոր կղզիներ հայտնաբերել։ Մի խոսքով՝ վայելում է կյանքը քաղաքականությունից դուրս։

Մանրամասները` «Հրապարակ» թերթի այսօրվա համարում: