Դուք ապախթանո՞ւմ եք աշխատանքը. Թադևոս Ավետիսյան

Գործադիրը փոփոխություն և լրացում է առաջարկում Աշխատանքային օրենսգրքում: Փոփոխությունը 265 հոդվածի մասով է, վերաբերում է հարկադիր պարապուրդին: Հարկադիր պարապուրդի հասկացությունը տրված չէ Աշխատանքային օրենսգրքով: Ներկա կարգավորումներով անձը մի վայրից աշխատանքից ազատվում է և վաղուց աշխատում է այլ վայրում, բայց քանի դեռ վիճարկվում է առաջին աշխատավայրից ազատման հիմքերի օրինականության հարցը և մինչեւ դատական ակտի ուժի մեջ մտնելը, այդ հարկադիր պարապուրդը շարունակում է հաշվարկվել:

ԱԺ կայքի հաղորդմամբ, անարդարացի մոտեցումը վերացնելու նպատակով նախատեսվում է հարկադիր պարապուրդի ժամանակահատվածում աշխատողի կողմից այլ գործատուի մոտ նոր աշխատանքի անցնելու դեպքերում տվյալ ժամանակահատվածի համար հարկադիր պարապուրդի համար վճարել նախկին աշխատանքի համար վճարված վերջին 9 ամսվա աշխատավարձի չափով գումար: Կվճարվի նաև նախկինում և հարկադիր պարապուրդի տվյալ ժամանակահատվածում նոր աշխատանքի դիմաց ստացած աշխատավարձերի դրական տարբերությունը: Եթե աշխատողն ինն ամսից պակաս է աշխատել, ապա տրվելու է այդ ժամանակահատվածի համար վճարված աշխատավարձի չափով գումար: Աշխատանքային օրենսգրքում առաջարկվող լրացումը և փոփոխությունը ԱԺ  նիստում քննարկման է ներկայացրել ՀՀ արդարադատության նախարարի տեղակալ Արմենուհի Հարությունյանը:

Նախագծի ներկայացումից հետո Աժ «Հայաստան» խմբակցության պատգամավոր Թադևոս Ավետիսյանն ասաց. «Երբ որ ասում ենք 9 ամսվա հատուցում, այդ 9 ամիսը պետք չէ առաջարկներով դարձնել 8 ամիս կամ 12, դա կոֆեի բաժակ նայելով չէ։ Այստեղ հստակ է դրված՝  մարդուն անօրինական գործատուն աշխատանքից ազատել է։ Հետո գնացել, վերականգնվել է։

Երկրորդ՝ ասում եք գտել է ախատանք։ Է հա, գտել է, դուք ապախթանո՞ւմ եք աշխատանքը։ Բա ասում էիք խթանում ենք աշխատանքը։ Գնացել է, գտել է աշխատանք, մասնագիտական աշխատանքի տեղը բանվորական աշխատանք է անում, հիմա ասում եք՝ կհատուցենք այն պակասը, որն ինքը ստանում է։ Խնդիրը միայն աշխատավարձի մեջ չէ։ Գործատուն անօրինական աշխատանքից ազատել է, պարտավոր է այդ ժամանակահտավածի համար նրա կորցրած եկամուտը վերականգնել։ Աշխարհում պրակտիկան այդպես է։ 

Զեկուցողը ոչ մի երկրի փորձ չբերեց։ Ինչո՞ւ։ Որովհետև չկա նման փորձ»։
Աղբյուր` Panorama.am