Արցախի ներկայացուցիչներից շենքը վերցնում եք, տաք ադրբեջանական «Սոկարի՞ն», թե՞ թուրքերին. Էդուարդ Շարմազանով

2019 թվականին Ակնան իր հայրենիքը համարած Ալեն Սիմոնյանը 2024 թվականին հրաժարվում է հայրենիքի վերաբերյալ իր նախկին ընկալումներից ու պնդում՝ Լեռնային Ղարաբաղ եզրույթ իր համար այլևս գոյություն չունի, ուստի պետք է լուծարել Արցախի Ազգային ժողովի և Հայաստանի Ազգային ժողովի համատեղ միջխորհրդարանական հանձնաժողովի ֆորմատը։

«Ես կարծում եմ, որ այդ ֆորմատը պետք է լուծարել, քանի որ երկրորդ կողմն այլևս իրավազոր չէ և չի ներկայացնում այն, ինչ ժամանակին ներկայացնում էր»,- խորհրդարանում նիստի մեկնարկին ասաց Սիմոնյանը՝ նախ ընդգծելով՝ «լա՛վ են արել», որ ստորագրել են Արցախն Ալիևին նվիրելու վերաբերյալ Պրահայի փաստաթուղթը, ապա հավելեց՝ ժամանակն է, որ քննարկվի Արցախի ներկայացուցչության շենքի հարցը՝ չբացառելով, որ շենքը կարող են վերցնել Արցախի ներկայացուցչությունից։

168 TV-ի «Ռեվյու» հաղորդաշարի եթերում ՀՀԿ ԳՄ անդամ Էդուարդ Շարմազանովից հետաքրքրվեցինք՝ ո՞րն է ադրբեջանցիների պես Արցախի էջը փակելու ալենսիմոնյանական դիրքորոշման պատճառը և ինչո՞ւ են նրա պահանջները համընկնում ադրբեջանական պահանջների հետ։

«Այդ անձը, «Քաղաքացիական պայմանագիր» խմբակն՝ իրենց ղեկավարով, սպասարկում են թուրք-ադրբեջանական շահերը և որևէ կապ չունեն Արցախի և Հայաստանի շահի հետ։ Ձեր կողմից մեջբերված խոսքերը ևս մեկ անգամ ապացուցում են մեր՝ տարիներ տևող պնդումները, որ իրենք հայկական շահի հետ կապ չունեն։ Ինձ համար զարմանալի բան չկա. նրանք իրենց քաղաքական հավատամք են ընտրել անսկզբունքայնությունը։

Հիմա նման բան են ասում մարդիկ, որոնք նուռը ձեռքներին սելֆիներ էին անում իրենց ասած Ակնայում, մեզ քննադատում էին փոխզիջումների համար։ Ի՞նչ եք սպասում մի «քաղաքական» ուժից, որն իր կոտրած ձեռքով ստորագրել է Պրահայի փաստաթութը, որով Արցախը մտել է Ադրբեջանի կազմի մեջ,- ասաց Շարմազանովը՝ այդ քայլը լավ արարք համարողներին հարցնելով,-  Բա որ լավ եք արել, 5000 զոհ ինչո՞ւ տվեցիք, իսկ կարո՞ղ է հաջորդիվ էլ ասեք՝ լավ ենք արել, որ 5000 զոհ ենք տվել»։

Ինչ վերաբերում է Արցախի ներկայացուցչության շենքը փակելու կամ վերցնելու իշխանական պատրաստակամությանը, ապա ՀՀԿ ԳՄ անդամը չբացառեց, որ այդ շենքն արցախցիներից կարող են վերցնել ու հատկացել թուրքերին կամ ադրբեջանցիներին։

«Շենքը կվերցնեն, կամ Թուրքիայի, կամ Ադրբեջանի ներկայացուցչություն կբացեն, կամ կտան ադրբեջանական «Սոկար» ընկերությանը»,- մտահոգություն հնչեցրեց Շարմազանովը։

Հարցազրույցի մանրամասները՝ տեսանյութում։