Խաղաղության պայմանագրի տեքստը ծայրից ծայր համաձայնեցված է, րոպե առաջ կարող ենք ստորագրել. Միրզոյան

«Ադրբեջանին փոխանցած «խաղաղության պայմանագրի» նախագծի 10-րդ խմբագրությունը ներառում է ամբողջապես համաձայնեցված տեքստը»,- Երևանում  Լյուքսեմբուրգի իր գործընկերոջ հետ համատեղ ասուլիսում ասաց ՀՀ արտգործնախարար Արարատ Միրզոյանը:

Նա մանրամասնեց, որ սրանք ամբողջապես համաձայնեցված հոդվածներ են կամ հոդվածների այն մասերը, որոնք  համաձայնեցնել են և սպասում են Ադրբեջանի արձագանքին։

«Փաստացի ամբողջ տեքստը ծայրից ծայր համաձայնեցված է, ու սա է եղել մեր առաջարկը՝ ստորագրել այն, ինչը հաջողվել է այս ընթացքում  համաձայնեցնել:  Հետևաբար, տեքստի շուրջ այլևս անհամաձայնություն չկա: Այլ բան է, որ երբեմն ադրբեջանական կողմն այլ նախապայմաններ, խնդիրներ է փորձում ներառել բանակցային  գործընթաց: Մեր մոտեցումն այն է, որ մենք օր առաջ, րոպե առաջ կարող ենք արդեն համաձայնեցված տեքստը  ստորագրել։ Իհարկե, մի  տեքստով, մի պայմանագրով բոլոր հարցերը հնարավոր չի լինի կարգավորեվել,  մնացյալը կմնա հետագա բանակցություններին՝ կողմերի երկուստեք հետաքրքրության դեպքում այս կամ այն հարցում։ 

Մենք հավատացած ենք, որ իրական  հնարավորություն կա սեղմ ժամկետներում ստորագրել  խաղաղության պայմանագիրը և Հարավային Կովկասում մեր մասով երկարատև կայունության ու խաղաղության էջ բացել»,-ասաց Ա.Միրզոյանը:

Նա նշեց, որ պատրաստ են օր առաջ, րոպե առաջ սկսել ենթակառուցվածքների ապաշրջափակման գործընթացը ««խաղաղության խաչմերուկ» հայեցակարգում ներկայացված սկզբունքների շրջանակում։
Աղբյուր` Panorama.am