Կախված է լինելու մարտահրավերներից. Դ. Հարությունյանը՝ Սերժ Սարգսյանի հետագա պաշտոնավարման մասին

«Երկրում ստեղծված իրավիճակով է պայմանավորված վարչապետի պաշտոնում առաջադրվելու հարցը»: Այդ մասին այսօր՝ դեկտեմբերի 20-ին Ազգային ժողովում լրագրողներին ասել է արդարադատության նախարար Դավիթ Հարությունյանը՝ մեկնաբանելով վարչապետի պաշտոնում Սերժ Սարգսյանի առաջադրվելու հնարավորությունը։

«Նման հարցերի քննարկման ժամանակ հաշվի են առնվում բազում գործոններ, և այսօր վաղ է խոսել, թե մենք ինչ իրավիճակում ենք լինելու այն ժամանակ, երբ ընտրելու ենք վարչապետ»,- շարունակեց Հարությունյանը:

Ի պատասխան դիտարկմանը, որ Սահմանադրության փոփոխություններից առաջ Սերժ Սարգսյանը հայտարարեց, որ չի հավակնում ո՛չ նախագահի, ո՛չ վարչապետի պաշտոնին, մինչդեռ այսօր արդեն չի բացառվում նրա վարչապետ դառնալը, Հարությունյանը կրկնեց` դա կախված է իրավիճակից:

Դիտարկմանը, թե ի՛նչ իրավիճակի մասին է ակնարկում, Հարությունյանն արձագանքեց. «Որոշումները կայացվելու են իրավիճակից ելնելով, եթե, օրինակ, իրավիճակն էապես փոխվի, օրինակ` ֆորսմաժորային իրավիճակ լինի: Երբ լինի որոշում, դուք դրա մասին կտեղեկացվեք: Այսօր ես պատրաստ չեմ ներկայացնելու իմ դիրքորոշումը: Իմ դիրքորոշումը կախված է լինելու այն մարտահրավերներից, որոնք այդ պահին առկա են լինելու»:

Zham.am