Թուրքիան, Ադրբեջանն ու Իրանը կակտիվացնեն էներգետիկ ոլորտում երեք երկրների միջև համագործակցությունը
Թուրքիան, Ադրբեջանն ու Իրանը պատրաստվում են ակտիվացնել էներգետիկ ոլորտում երեք երկրների միջև առկա համագործակցությունը։ Այս մասին հայտարարել է Թուրքիայի արտաքին գործերի նախարար Մևլութ Չավուշօղլուն Բաքվում ԱԳՆ ղեկավարների մակարդակով կայացած եռակողմ հանդիպման ժամանակ: Այս մասին, ինչպես տեղեկացնում է «Tert.am»-ը, գրում է թուրքական «Հյուրրիյեթ» պարբերականը:
«Մենք գնում ենք նավթ և բնական գազ և՛ Իրանից, և՛ Ադրբեջանից, ցանկանում ենք ավելացնել այս երկու եղբայրական պետություններից գնվող նավթի ու բնական գազի ծավալները: Մեր կողմից շարունակվում են նաև աշխատանքներն իրանական գազը միջազգային շուկա հանելու ուղղությամբ»,- հայտնել է Չավուշօղլուն՝ շեշտելով, որ հարևան երկու պետությունները կարևոր գործընկեր են Թուրքիայի համար էներգետիկ ոլորտում:
Չավուշօղլուն նշել է, որ Բաքվում անցկացված հանդիպման ժամանակ քննարկվել են նաև տնտեսական բնույթի այլ հարցեր, ինչպես նաև տրանսպորտային ոլորտում համագործակցությանը վերաբերող խնդիրներ:
Թուրքիայի ԱԳՆ ղեկավարը հայտնել է նաև, որ երեք երկրների միջև հաջորդ՝ արդեն վեցերորդ եռակողմ հանդիպումը տեղի կունենա Թուրքիայում և դրան կմասնակցեն նաև էկոնոմիկայի նախարարները:
Հետևեք մեզ Facebook-ում