Վանաձորում բռնում են 2018-ի թունդ նիկոլականների... կաշառքի մեղադրանքով

«Հրապարակը» գրում է. «Մեր տեղեկություններով՝ երեկ ձերբակալություններ են տեղի ունեցել Լոռու մարզում։ Նախնական տեղեկություններով՝ կաշառք վերցնելու կասկածանքով ձերբակալվել են Վանաձորի քաղաքապետարանի ճարտարապետական բաժնի ղեկավարը եւ Վանաձորի «Գլորիա» կարի ֆաբրիկայի մի շարք աշխատակիցներ, նաեւ՝ տնօրենը։ Խոսքը մոտ 10 անձի մասին է: Ֆաբրիկայի տնօրենը Բագրատ Դարբինյանն է։ Հակակոռուպցիոն կոմիտեից մեր հարցին ի պատասխան չհերքեցին փաստը, միայն փոխանցեցին, որ այս պահին մեկնաբանություն չունեն։

Վանաձորի քաղաքապետարանից տեղեկացանք, որ առավոտյան անսպասելիորեն քաղաքապետարան են ժամանել ԱԱԾ աշխատակիցներ եւ իրենց հետ տարել են ճարտարապետական բաժնի պետ Սուրեն Աբովյանին: Ի դեպ, նա Մամիկոն Ասլանյանի նշանակած կադրն է եւ անցնում է նաեւ Ասլանյանի քրեական գործով: Մեզ ասացին, որ համատիրությունից դրական բնութագիր են ներկայացրել Աբովյանի վերաբերյալ, որպեսզի կալանք չկիրառվի: Ինչ վերաբերում է «Գլորիա» ֆաբրիկային, ապա սա Վանաձորի ամենանիկոլական կոլեկտիվն է, որը 2018 թվականին փողոցից տուն չէր գնում եւ հեղափոխության ակտիվ մասնակիցներից էր»:
Մեկ այլ հրապարակմամբ թերթը նաև նշում է. «Տեղեկացանք, որ Վանաձորի քաղաքապետարանի ճարտարապետական բաժնի ղեկավարը՝ Սուրեն Աբովյանը «Գլորիա» ֆաբրիկայի տնօրենից և այլ անձանցից կաշառք վերցնելու մեղադրանքով կալանավորվել է երկու ամսով։ 

Ի դեպ, Սուրեն Աբովյանը դեռ Մամիկոն Ասլանյանի ժամանակներից է աշխատում, որպես մեղադրյալ անցնում է Ասլանյանի քրեական գործով: Մեր տեղեկություններով, առավոտյան ԱԱԾ-ն անսպասելիորեն մտել է քաղաքապետարան եւ տարել բաժնի պետին: Մենք տեղեկացանք, որ երեկ օրվա ընթացքում նրա մասին բնութագիր են պատրաստել եւ ներկայացրել վարույթն իրականացնող մարմնին»: