Իմ հանդեպ հարուցված շինծու գործը իշխանության պատվեր է եղել. Ալբերտ Բազեյան

«Իմ հանդեպ հարուցված շինծու քաղաքական գործը գործող իշխանության քաղաքական պատվեր է եղել, որի հետևանքով ես 6 ամիս ապօրինաբար ազատազրկվել եմ և գտնվել կալանավայրում, այնուհետև 5 ամիս գտնվել եմ տնային կալանավորի կարգավիճակում»,-   ասուլիսի ասաց պահեստազորի գնդապետ, Երևանի նախկին քաղաքապետ Ալբերտ Բազեյանը:

Նա նշեց, գործող իշխանության հրահանգով և Ազգային անվտանգության ծառայության հատուկ կարևորագույն գործով քննիչ Սպարտակ Պողոսյանի կողմից հորինված ապօրինի մեղադրանքով և Աջափնյակի ընդհանուր իրավասության Առաջին ատյանի քրեական դատարանի անարդարացի և ոչ իրավաչափ որոշումներով, խախտվել է իր ազատ տեղաշարժվելու և քաղաքական հայացքներն ու դիրքորոշումներն ազատ արտահայտելու սահմանադրական իրավունքը։

Ալբերտ Բազեյանը նաև հայտնեց, որ դիմելու է ՄԻԵԴ։ 

«Փաստում եմ՝ որևէ իշխանություն հավերժ չէ և ներկայիս նիկոլական իշխանությունը վաղ թե ուշ հեռացվելու է, Հայաստանում ձևավորվելու է նոր՝ ազգային և հայրենապաշտ իշխանություն։
Նիկոլ Փաշինյանը և նրա գաղափարակից պաշտոնյաները ենթարկվելու են Հայաստանի  օրենքով սահմանված կարգով դատական պատասխանատվության՝ Հայաստանին հանպատրաստից պատերազմի տանելու, տաղանդավոր ու հաղթական հայ ժողովրդին պարտության մատնելու, Արցախն ամբողջությամբ թշնամուն հանձնելու և Հայաստանի մի քանի տասնյակ քառակուսի կիլոմետր, պաշտպանական կարևոր դիրքեր հակառակորդին թողնելու, 5 հազարից ավելի զինվորների զոհաբերելու համար»,- ասաց Ա. Բազեյանը։

Նա նշեց, որ իր գործունեությունը իր զինակից և գաղափարակից ընկերների հետ միասին ուղղված է  գործող ապազգային, պարտվողական իշխանության հեռացմանը  և ՀՀ Սահմանադրությամբ նախատեսված կարգով արդար և օրինական արտահերթ ընտրություններ միջոցով  ձևավորելու նոր ազգային իշխանություն։
Աղբյուր` Panorama.am