Ի՞նչ է կատարվում Երևանի ՋԷԿ-ում և ի՞նչ կապ ունի դրա հետ Գնել Սանոսյանը

Մեզ հասած տեղեկությունների համաձայն՝ տևական ժամանակ է՝ միակ պետական մնացած և ռազմավարական նշանակություն ունեցող Երևանի ՋԷԿ-ում տիրում է մատրիարխատ, այն է՝ ամիսներ շարունակ կառույցը դե-ֆակտո ղեկավարվում է նույն ընկերության փոխտնօրեն՝ Ալիսա Բաղդասարյանի և Տարածքային Կառավարման և ենթակառուցվածքների նախարար Գնել Սանոսյանի քրոջ (ազգականի)՝ Անի Սերոբյանի կողմից։

Խնդիրը նրանում է, որ բարձր պաշտոն զբաղեցնող կանայք տևական ժամանակ է՝ իրենց բուն պարտականությունները թողած՝ զբաղված են նեղ անձնական հարցեր լուծելով, բամբասանքներով, տարիներ շարունակ կուտակված վրեժը աշխատակազմից լուծելով։ Մեզ հասած տեղեկությունների համաձայն՝ վերը նշված տանդեմի ղեկավարման օրոք աշխատանքից ազատվել է ավելի քան 10 անձ, լուծարվել են բաժիններ, ստեղծվել է անառողջ և աշխատելու համար անբարենպաստ մթնոլորտ։

Մեր տեղեկություններով՝ կայանը այս պահին չի շահագործվում, քանի որ ղեկավար անձնակազմը համապատասխան գնումներ կազմակերպելու և դրանով իսկ կայանի բնականոն աշխատանքը ապահովելու նպատակով համապատասխան սարքավորում ձեռքբերելու փոխարեն զբաղված է աշխատակիցներին տեսախցիկներով վերահսկելով, միմյանց դեմ լարելով, զեկուցագրեր գրելու հրամաններ արձակելով։

Հարկ է նկատել, որ կայանի մեկ օրվա չաշխատելը միլիոնավոր դրամների կորուստ է պետական բյուջեի համար։ Հիշեցնենք, որ Երեւան ՋԷԿ-ը Հայաստանի խոշոր հարկատուների ցուցակում է։ Ուշագրավ է նաև, որ այս ինքնաֆինանսավորվող, հարուստ կառույցն աչքի է ընկել նաև իր հետաքրքրաշարժ գնումներով և հաղթողների շրջանակով (մեր ունեցած տեղեկությունների համաձայն՝ ընկերության ղեկավար անձնակազմի բարեկամներն անմասն չեն մնացել այդ գործընթացներից), որն առանձին քննարկման և հոդվածի նյութ է։ Հասկանալի է, թե ինչու է այս բարձիթողի վիճակն անտեսում նախարար Գնել Սանոսյանը՝ հաշվի առնելով ազգակցուհու գործոնը, սակայն անհասկանալի է այլ՝ ավելի բարձր օղակների անտարբերությունը երկրի համար այս կարևորագույն կառույցի նկատմամբ։

Հարց է առաջանում, թե ո՞վ է պատասխան տալու և վնասները փոխհատուցելու՝ նախարար Սանոսյա՞նը, ում լուռ համաձայնությամբ է ստեղծվել և շարունակվում նշված իրավիճակը Երևանի ՋԷԿ-ում, տնօրենի պաշտոնակատա՞րը, ով մոռացել է իր բուն պարտականությունները, նախարարի բարեկամ Անի Սերոբյա՞նը, ով փաստացի ղեկավարում է ընկերությունը, թե՞, այնուամենայնիվ, ինչպես միշտ, կգտնվեն քավության նոխազներ։

Երևանի ՋԷԿ-ում իրականացված և իրականացվող գնումների մասին՝ հաջորդիվ։

Պետրոս Ալեքսանյան
7or.am