Հիշատակն արդարոց օրհնությամբ եղիցի. ավարտվել է Սերժ Սրապիոնյանի երկրային ուղին

Ցավով հայտնում ենք, որ երկարատև, ծանր հիվանդությունից հետո, 67 տարեկանում ավարտվել է գրականագետ, մտավորական, նվիրյալ քաղաքացի, հրաշալի ուսուցիչ Սերժ Սրապիոնյանի երկրային ուղին:

Սերժ Սրապիոնյանը ծնվել է 1957 թվականի ապրիլի 6-ին։ Նա 1977-1983 թթ. - սովորել և ավարտել է Երևանի պետական համալսարանի հայ բանասիրության ֆակուլտետը, ապա՝ նույն ֆակուլտետի ասպիրանտուրան։ Բանասիրական գիտությունների թեկնածու (1989)։

Սերժ Սրապիոնյանը 1987-2013 թթ. եղել է ԵՊՀ Հայ գրականության պատմության ամբիոնի դասախոս, ապա՝ դոցենտ։ 
Իսկ 2013 թ. սեպտեմբերի 28-ին ՀՀ վարչապետի որոշմամբ նշանակվել է Հայաստանի Հանրապետության սփյուռքի նախարարի տեղակալ: Այդ պաշտոնից ազատվել է 2018 թվականի մայիսի 16-ին:

Վերջին տարիներին Սերժ Սրապիոնյանը, բացի գիտությամբ զբաղվելուց, հանդես է եկել ակտիվ քաղաքացիական դիրքորոշմամբ, ի տարբերություն շատ-շատերի, որպես գիտնական, որպես մտավորական, որպես սրտացավ հայ մարդ հրապարակավ ու համարձակ իր ընդվզումն ու արմատական անհամաձայնությունն է արտահայտել ապազգային իշխանությունների ու նրանց ավերակիչ գործունեության վերաբերյալ: 

«Ժամ.ամ»-ի խմբագրակազմը վշտակցում է Սերժ Սրապիոնյանի ընտանիքի անդամներին, հարազատներին, մտերիմներին: Հիշատակն արդարոց օրհնությամբ եղիցի: