«Տղամարդկություն ունեցի իրա դեմը խոսա». վեճ ԱԺ հանձնաժողովի նիստին (Տեսանյութ)

«ՀՀ-ում մարդու պապիլոմա վիրուսի դեմ պատվաստումների վերաբերյալ» թեմայով ԱԺ-ում անցկացված քննարկումից հետո արդարադատության նախարարի տեղակալ Սուրեն Քրմոյանի և «Լույս» տեղեկատվական-վերլուծական կենտրոնի ղեկավար Հայկ Այվազյանի միջև վիճաբանություն ծագեց:Այս մասին հայտնում է tert.am-ը ։

Փոխնախարար Քրմոյանը Հայկ Այվազյանին նկատողություն արեց հնչեցրած մեղադրանքների համար ուղղված Առողջապահության փոխնախարար Սերգեյ Խաչատրյանին, թե նրա ձախողած սքրինինգային ծրագրով տասնյակ կանայք հիվանդացել են և մահացել:

Քրմոյանը պահանջեց ՀԿ ներկայացուցչին իրեն կոռեկտ պահել, այն մարդու մասին խոսելիս, ով ներկա չէ և հրավիրեց դուրս հաշիվ պարզելու: Այվազյանն էլ իր հերթին զգուշացրեց. «Դու ինձ դիտողություն չանես, ստեղ երեխա չկա»:

Սուրեն Քրմոյանը շարունակեց. «Տղամարդկություն ունեցի իրա դեմը խոսա»: «Ես եմ որոշում խոսամ, թե չխոսամ»,-պատասխանեց Հայկ Այվազյանը:

Tert.am-ի հետ զրույցում Հայկ Այվազյանը նշեց, թե ինքը ընդամենը հնչեցրել է կարծիք, որ Սերգեյ Խաչատրյանը ձախողել է սքրինինգային ծրագիրը: «Երբ ասացին, որ պատվաստմանը դեմ խոսացող մարդիկ ինչպես են նայելու կանանց աչքերին, ես էլ հակադարձեցի, թե ինչպես է նույն Սերգեյ Խաչատրյանը նայել այն կանանց աչքերին, որ տարիների ընթացքում ձախողված սքրինինգի պատճառով հիվանդացել ու մահացել են»,-վիճաբանության սկիզբը ներկայացրեց Այվազյանը և հավելեց, թե «պարոն Քրմոյանն իրեն ոչ կոռեկտ արտահայտություններ թույլ տվեց:

«Ասաց «տղա ջան», չգիտեմ ինչ: Նախ՝ ինքը չի տարբերում անձնականը պաշտոնատար անձի կատարած գործառույթներից: Ես Սերգեյ Խաչատրյանին ոչ թե անձ էի դիտարկում, այլ որպես պաշտոնատար անձ»,-ասաց նա:

Հարցին, թե ինչու դուրս չեկավ փոխնախարարին բացատրելու, որ իր դիտարկումներն ուղղված էին պաշտոնյա Սերգեյ Խաչատրյանին, Այվազյանը նշեց. «Ազգային ժողովն այն տեղը չէր, որ առանձին քննարկում լինի, միգուցե նորմալ պայմաներում կքննարկենք, բայց եթե չի տարբերում անձնականը գործնականից, դա իր խնդիրն է, իմը չէ»:

Սուրեն Քրմոյանը նիստից հետո ասաց, թե քննարկվող հարցն իր թեման էլ չէր, ուղղակի լսելով նման հայտարարություններ, կարծիք էր հայտնել, որ չի կարելի:

«Քննարկում ենք լուծումներ, քաղաքականության թեմաներ, անձը չկա՝ ֆիքսվում ենք անձի վրա: Իմ դիտարկումը հետևյալն էր, որ եթե անձը կա քննարկեք քաղաքականություն, ճիշտ են արել, սխալ են արել և այլն: Երբեք նման խնդիր չեմ ունեցել, ուղղակի երբ մարդը չորս, հինգ, վեց անգամ դիտարկում է անում ո՛չ երևույթի մասին, ո՛չ կարգավորման մասին, և ո՛չ էլ օրենքի մասին, այլ խոսում է անձի մասին, ասում ենք գնա այդ մարդուն իր դիմացը կանգնի ասա, մենք այստեղ խոսում ենք երևույթների մասին»,-նշեց նա: