ՀՀ-ում ավելի քան 100 մարդ հավատացել է կեղծ զանգերին. քրեական վարույթ է նախաձեռնվել

Մեծ թվով քաղաքացիներից խարդախությամբ խոշոր գումարներ են հափշտակելու համար ՀՀ քննչական կոմիտեն քրեական վարույթ է նախաձեռնել։ Տեղեկությունը հայտնում է ՔԿ մամուլի ծառայությունը։

Ավելի վաղ հայտնել էինք, որ Հայաստանում խաբեությամբ գումար հափշտակելու նոր մեթոդ է տարածվում` խարդախները զանգում են քաղաքային և բջջային հեռախոսահամարներին և զանգին պատասխանողին ասում, թե նրա հարազատն իբր վթարի է ենթարկվել կամ վրաերթի է ենթարկել ինչ–որ մեկին, և պետք է շտապ գումար փոխանցել բուժման համար: Խնդրի մասին քաղաքացիները սկսեցին ահազանգել սոցցանցերում, որպեսզի մյուսները զգոն լինեն։

ՀՀ ներքին գործերի նախարարությունից Sputnik Արմենիային հայտնել էին, որ 14 մարդ հավատացել է խաբեբաներին և ընդհանուր մոտ 28 միլիոն դրամ փոխանցել։

Ներկայացված հաղորդումների առթիվ նախաձեռնվել են քրեական վարույթներ ՀՀ քրեական օրենսգրքի 255-րդ հոդվածի (խարդախությունը) տարբեր մասերի հատկանիշներով:

Անհրաժեշտ քննչական և այլ վարութային գործողություններ են ձեռնարկվում հանցագործություն կատարող անձանց շրջանակը պարզելու համար։

ՔԿ–ն քաղաքացիներին հորդորում է խաբեության փաստն արձանագրելու կամ կասկածներ ունենալու դեպքում անմիջապես կապ հաստատել իրենց հետ։