Արթուր Ալեքսանյանը կպայքարի օլիմպիական ոսկու համար, իսկ Մալխաս Ամոյանը՝ բրոնզի

Փարիզում ընթացող ամառային օլիմպիական խաղերում Հայաստանը ներկայացնող բազմատիտղոսակիր հունահռոմեական ոճի ըմբիշներ Մալխաս Ամոյանը և Արթուր Ալեքսանյանը իրենց քաշային կարգերում անցկացրեցին կիսաեզրափակիչ մրցամարտերը: 
Ցավոք, Մալխաս Ամոյանը պարտվեց Ճապոնիայի ներկայացուցչին՝ գրեթե հավասար գոտեմարտում չկարողանալով մրցամարտի ընթացքը բեկել իր օգտին: 
Մալխաս Ամոյանը կպայքարի օլիմպիական բրոնզի համար, ըստ որում, նրա մրցակիցը լինելու է թշնամական Ադրբեջանի ներկայացուցիչ: 
Իսկ Արթուր Ալեքսանյանը ըուբացի մրցակցի հետ գոտեմարտը փայլուն անցկացրեց, հատկապես՝ առաջին խաղափուլը, որի ընթացքում չնայած մրցակիցը կարողացավ «պարտեր» դիրքում գտնվող Ալեքսանյանի նկատմամբ հնարք (նետում) կատարել, սակայն Ալեքսանյանը կայծակնային արագությամբ արձագանքեց ու, հակահնարք կիրառելով, արագորեն հայտնվեց բարձր դիրքում, որից հետո իրարահաջորդ երկու գլորմամբ հաշիվը դարձրեց 5-3: Դրանից հետո մրցագորգի վրա ծավալվեց դիրքային համառ ու անզիջում պայքար, որի ընթացքում կուբացի մարզիկը չկարողացավ որևէ առավելություն ստանալ: 
Արթուր Ալեքսանյանը կպայքարի օլիմպիական ոսկու համար: 
Հաջողություն ենք մաղթում մեր մարզիկներին: 
Հավելենք, որ մեր մարզիկների կիսաեզրափակիչ մրցելույթները փաշինյանական Հ1-ը հեռարձակեց: Նույնիսկ մարզական միջոցառման հետ կապված, փաշինյանական իշխանության «ազատությունաֆիկացված» քարոզչամիջոցը «հաջողացրեց» հարուցել մարզասեր հանրության բուռն դժգոհությունը, քանի որ նախորդ փուլում մեր ըմբշամարտիկների ելույթները չէր հեռարձակել: 
Zham.am